APR FC yatsinze Bugesera ku munota wa nyuma isubira ku mwanya wa mbere

Yanditswe na

Sammy Imanishimwe

17-04-2022 - 18:55' | Ibitekerezo ( 1 )

Ikipe ya APR FC itsinze Bugesera FC igitego 1-0 gitsinzwe mu minota y’inyongera, bituma APR FC isubira ku mwanya wa mbere nyuma yo gutsindwa kwa Kiyovu Sports

Kuri Stade ya Bugesera iri i Nyamata mu karere ka Bugesera, Bugesera FC yari yakiriye APR FC mu mukino w’umunsi wa 23 wa shampiyona.

Ni umukino ikipe ya Bugesera yari yihagazeho iminota 90 yose y’umukino, ariko mu minota ine y’inyongera Mugisha Bonheur aza gutsindira APR FC igitego kimwe rukumbi ku ishoti rikomeye yatereye inyuma y’urubuga rw’amahina.

Nyuma yo gutsinda uyu mukino APR FC yahise isubira ku mwanya wa mbere n’amanota 51, igakurikirwa na Kiyovu ifite amanota 50 nyuma y’uko ku wa Gatanu yari yatsinzwe na Gasogi United.

APR FC yongeye kuyobora urutonde rwa shampiyona

AS Kigali iwayo ntiyabashije gucika Etincelles FC.

Ikipe ya Etincelles ni yo yafunguye amazamu ku munota wa 53 w’umukin. AS Kigali yaje kwizera intsinzi nyuma yo gutsinda ibitego bibiri ku munota wa 80 na 82 bitsinzwe na Shaban Hussein Tchabalala ndetse na Michael Sarpong.

Michael Sarpong yatsinze igitego cya kabiri cya AS Kigali

Ku munota wa 90+1’ ikipe ya Etincelles yaje kuburizamo intsinzi ya AS Kigali ku gitego cyongeye gutsindwa na Rachid Mutebi, umukino urangira ari ibitego 2-2.