APR FC yatewe mpaga

Yanditswe na

Jean Jules Uwimana

6-11-2024 - 19:52' | Ibitekerezo ( 2 )

Kuri uyu wa Gatatu, ikipe ya APR FC yatewe mpaga kubera gukinisha abakinnyi barindwi b’Abanyamahanga mu mukino w’umunsi wa munani wa shampiyona wayihuje na Gorilla FC ku wa 3 Ugushyingo 2024.

APR FC yatewe mpaga kubera kurenga ku mategeko y'imikinishirizwe y'abanyamahanga mu kibuga

Ni icyemezo cyafashwe na Komisiyo Ishinzwe Amarushanwa kuri uyu wa 6 Ugushyingo 2024, ihanisha APR FC gutsindwa ibitego 3-0 kubera kugira Abanyamahanga barindwi mu kibuga (Pavelh Ndzila, Alioum Souane, Thaddeo Lwanga, Mahamadou Lamine Bah, Chidiebere Nwodobo, Victor Mbaoma, Mamadou Sy) aho kuba batandatu nk’uko amategeko abiteganya.

Ubundi amategeko agenga amarushanwa muri shampiyona y’icyiciro cya Mbere mu mupira w’amaguru mu Rwanda, yavuguruwe ku wa 1 Nzeri 2024, mu ngingo ya 8.2 ivuga ko makipe yo mu cyiciro cya Mbere yemerewe gushyira ku rupapuro rw’umukino abakinnyi b’abanyamahanga batarenze 10 no gukinisha abakinnyi b’abanyamahanga batarenze batandatu mu kibuga.

Iyi mpaga yatumye APR FC ikurwaho inota rimwe yari yabonye inganya na Gorilla FC 0-0, aho byatumye igira amanota ane ku mwanya wa 15, irusha Kiyovu Sports ya nyuma inota rimwe ariko ikaba ifite imikino itanu y’ibirarane itari yakina.

Iyi kipe kandi yari yamaze guhagarika mu nshingano uwari ushinzwe ubuzima bwa buri munsi bw’ikipe (Team Manager), Capt (Rtd) Eric Ntazinda, kubera aya makosa yakozwe kandi ari bimwe mu nshingano ze.