Uyu musore wari umaze iminsi avugwa muri APR FC, byamenyekanye ko yasinye imyaka ibiri akinira iyi kipe y’Ingabo z’Igihugu. Denis Omedi muri shampiyona ya 2023-2024 yatsindiye Kitara ibitego 15, aho yaje ku mwanya wa kabiri mu batsinze ibitego byinshi.

Nubwo bimeze gutyo ariko mu mwaka w’imikino wa 2024-2025 muri shampiyona, Denis Omedi imibare igaragaza ko amaze gukina imikino icumi(10), ariko atari yatsindamo igitego na kimwe, ibi ariko ahanini ngo byatewe no kuba yari amaze imikino myinshi adakina kuko kuva Kitara FC yatsinda UPDF ibitego 4-0 tariki 22 Ugushyingo 2024, atongeye gukina kugeza tariki 5 Mutarama 2025, agaruka ku mukino banganyije na Wakiso Giants 0-0 yakinnyemo iminota 68.

Muri icyo gihe atakinaga, ahanini byatewe no kuba yari mu bibazo byo kwifuza kuva muri iyi kipe atashatse kongerera amasezerano, dore ko ayo yari afite yari kurangira mu mpeshyi ya 2025, ndetse n’impindika zabaye mu batoza, byose byatumye asiba imikino ine(4) ya shampiyona, kuko atabaga no ku rupapuro rw’umukino.

Denis Omedi w’imyaka 30 y’amavuko, kuva mu 2023 akinira ikipe y’igihugu ya Uganda aho amaze kuyikinira imikino 12, yatsinzemo ibitego bibiri byonyine.

Uyu ni umukinnyi wa kabiri ikipe ya APR FC isinyishije muri uku kwezi kwa Mutarama, nyuma n’ubundi yo kurangizanya na Hakim Kiwanuka ukina ku ruhande asatira, mu mpera z’icyumweru gishize na we ukomoka muri Uganda, wakiniraga ikipe ya Villa SC wasinye imyaka ibiri.

Amakuru y’isinya rya Denis Omedi, yatangajwe n’umunyamakuru Kalisa Bruno Taifa akaba n’umukunzi wa APR FC, ku muyoboro we wa YouTube.