Uru rutonde rwashyizwe hanze na FIFA, kuri uyu wa 28 Ugushyingo 2024, rugaragaza ko Amavubi yazamutseho iyo myanya ibiri n’amanota 1136.06.

Uku kuzamuka kw’ikipe y’Igihugu, biraterwa n’uburyo ikomeje kwitwara, cyane ko muri uku kwezi k’Ugushyingo yaherukaga gutsinda Nigeria ibitego 2-1, nubwo mbere gato yari yatsinzwe na Libya igitego 1-0, mu mikino yo gushaka itike y’igikombe cya Afurika cya 2025.

U Rwanda kandi rwakinnye na Djibouti mu majonjora ya CHAN rutsinda umukino umwe muri ibiri, yombi yabereye kuri Stade Amahoro.

Ibihugu byazamutse imyanya myinshi birimo Niger yazamutse imyanya icyenda ivuye ku mwanya 131 igera ku mwanya wa 122, bivuye ku musaruro wo gutsinda Ghana ibitego 2-1 mu mikino yo gushaka itike y’igikombe cya Afurika cya 2025.

Habayeho kandi impinduka mu bihugu 10 bya mbere ku Isi ugereranyije nuko byari bimeze mu kwezi k’Ukwakira aho u Budage bwaje ku mwanya wa 10, urutonde rukaba rukiyobowe na Argentine ikurikiwe n’u Bufaransa, Espagne, u Bwongereza, Brazil, Portugal, u Buholandi, u Bubiligi, u Butaliyani n’u Budage.

Ku mugabane wa Afurika, ibihugu 10 bya mbere ni Maroc (14), Sénégal (17), Misiri (33), Algeria (37), Nigeria (44), Côte d’Ivoire (46), Cameroun (49), Mali (51), Tunisia (52), Repubulika Iharanira Demokarasi ya Congo (61).

Mu Karere ka Afurika y’Iburasirazuba, Repubulika Iharanira Demokarasi ya Congo niyo iza imbere aho ku rwego rw’Isi ari iya 61, Uganda (88), Tanzania (106), Kenya (108) ndetse n’u Burundi buri ku mwanya w’139.