Ikipe y’u Rwanda yakinnye neza mu gice cya mbere, niyo yabanje gufungura amazamu ku munota wa 37 ubwo Meddie Kagere yatsindaga igitego cyiza ku mupira mwiza yari ahawe na Edwin Ouon wakinaga hagati, maze akajijisha Diakite Soumaila wari urinze izamu rya Mali, ahita amutera mu ruhande atari arimo.

Igice cya kabiri cyihariwe na Mali ndetse inatsindamo ibitego bibiri mu gihe kingana n’iminota itanu gusa. Ku munota wa 50, amakosa yakozwe na Mbuyu Twite na Salomon Nirisarike batahagaze neza imbere y’izamu nka ba myugariro, byatumye rutahizamu wa Mali Samassa Mahamadou atsinda igitego cya mbere cya Mali ku mupira mwiza yaherejwe na Kapiteni wayo Seydou Keita.

Icyo gitego cyatumye Amavubi ahungabana, maze atangira gukina nabi cyane mu kugarira. Ku munota wa 55 gusa, Abdou Traore yahise atsinda igitego cya kabiri cya Mali ubwo yacikaga abakinnyi b’inyuma b’Amavubi akagenda wenyine, maze aroba umupira Ndoli Jean Claude wari urinze izamu ry’Amavubi.

Igice cya mbere cy’Amavubi cyatandukanye cyane n’igice cya kabiri, kuko mu gice cya mbere Amavubi yabonye amahirwe menshi cyane kandi yakinaga umupira mwiza wo gusatira ndetse aniharira umupira kurusha Mali.

Nyuma yo kwishyurwa ibitego bibiri hagati yabyo harimo iminota itanu gusa, umutoza w’Amavubi Milutin Micho yinjije mu kibuga abakinnyi basatira nka Uzamukunda Elias (Baby) na Jessy Reindford bakomeje gushakisha uko babona ibindi bitego ariko biranga.

Umutoza wa Mali, Patrice Carteron, ukomoka mu Bufaransa avuga ko Amavubi yamurushije umukino mwiza mu gice cya mbere ndetse n’ubwo mu gice ya kabiri yabonyemo intsinzi ntiyigeze arusha Amavubi umupira, gusa ngo yabarushije inararibonye.

“Mu by’ukuri ikipe y’u Rwanda yatugoye cyane mu gice cya mbere ndetse inadutsinda igitego ariko abakinnyi banjye bagarukanye imbaraga mu gice cya kabiri, cyane ko bazi gukina bashaka kwishyura kandi babigezeho. Ikipe y’u Rwanda ni ikipe igaragaza ko ifite imbere heza, gusa ikintu kimwe ntayirushije ni inararibonye”.

Mugenzi we Milutin Sredojevic Micho utoza Amavubi we yashimye abakinnyi be uko bakinnye n’ubwo batatsinze, ariko avuga ko ikibazo cya ba myugariro kimaze kuba akarande aricyo cyakoze ku Mavubi.

“Ibyo twabonye uyu munsi nibyo abakinnyi b’u Rwanda bari bashoboye nta kindi twakongeraho kandi ndabashimira umukino bagaragaje.

Nk’uko byagaragaye, ibitego twatsinzwe byose ni amakosa atajya ashira akorwa n’abakina inyuma. Ibi bihora bibaho cyane, kandi no mu mikino yatambutse, niko byagiye bigenda. Urugero nabaha murebe no mu mukino duheruka gutsindwamo na Libya nabwo byarabaye”.

Nyuma yo gutsindwa na Mali, u Rwanda rwatakaje amahirwe menshi yo kubona itike yo kuzakina igikombe cy’isi kizabera muri Brazil muri 2014, kuko ubu Amavubi yagumye ku mwanya wa nyuma mu itsinda rya munani n’inota rimwe gusa, mu gihe Mali yo yahise igira amanota atandatu. Ku mwanya wa kabiri hari Benin ifite amanota ane, naho Algeria ikaza ku mwanya wa gatatu n’amanota atatu.

Dore abakinnyi babanje mu kibuga ku mpande zombi:

Rwanda: Ndoli Jean Claude, Kalisa Mao, Edwin Ouon, Salomon Nirisarike, Iranzi Jean Claude, Fabrice Twagizimana, Gasana Eric, Haruna Niyonzima, Olivier Karekezi, Birori Daddy na Meddie Kagere.

Mali: Diakite Soumaila, Diawarra Fousseyni , Coulibaly Adama, Wague Molla, Tamboura Adama, Sissoko Mohamed Lamine, Seydou Keita, Samba Sow, Coulibaly Ousmane, Samassa Mahamadou na Abdou Traore.

Theoneste Nisingizwe