Aya masezerano y’akazi ya Cissé yo gutoza ‘Les Lions de la Teranga’ yarangiye tariki ya 31 Kanama uyu mwaka. Yari yasabye ko yavugururwa ariko Minisitiri Khady Diéne ahitamo ko amasezerano atongerwa.

Minisitiri Khady asobanura ko Cissé atageze ku nshingano yari yiyemeje ubwo yasinyaga amasezerano, harimo gutwara igikombe cy’Afrika cyabaye muri Mutarama muri Côte d’Ivoire, no kugeza ikipe ya Senegal, muri 1/4 cy’igikombe cy’Isi cya 2022 muri Qatar. Muri aya marushanwa yombi, Senegal yaviriyemo muri 1/8.

Indi mpamvu Minisitiri Khady Diéne Gaye yatanze ku kutongerera amasezerano Aliou Cissé, ni uko Senegal yasubiye inyuma ku rutonde rwa FIFA rw’amakipe y’ibihugu, aho kuri ubu iri ku mwanya wa 21. Yatakaje imyanya ine kuva muri Gashyantare uyu mwaka.

Ibi byose nibyo Minisitiri Khady asanga ngo bishobora gutuma Abanyasenegal badakomeza gukunda no gushyigikira ikipe yabo.

Nubwo bimeze bityo, Aliou Cissé kuva yagera muri iyi kipe ya Les Lions de la Teranga mu 2015, mu mikino yose hamwe 107 yatoje, kuko yatsinze 70, anganya 24, atsindwa 13 gusa. Yatwaye kandi igikombe cy’Afurika (AFCON 2021) muri Cameroun. Yabaye uwa kabiri muri AFCON ya 2019 yabereye mu Misiri.

Kugeza ubu uzasimbura Aliou Cissé, wahoze ari umukinnyi ukomeye w’ikipe y’Igihugu ya Senegal, mbere yo kuyibera umutoza, ntaramenyekana.