Ni ku nshuro ya kabiri yikurikiranya, APR BBC yegukana igikombe cya shampiyona nyuma y’icya 2023 yatwaye itsinze ikipe ya REG BBC muri Kamarampaka, ndetse kikaba n’igikombe cya 15 muri rusange.

Ubwo iyi mikino ya kamarampaka yatangiraga, umukino wa mbere wegukanywe n’ikipe ya Patriots BBC, umukino wa kabiri ndetse nuwa gatatu byegukanwa n’ikipe ya APR BBC.

Umukino wa kane waje kwegukanwa n’ikipe ya Patriots BBC, gusa umukino wa gatanu ndetse nuwa gatandatu wakinwaga kuri iki Cyumweru yongera kwegukanwa n’ikipe ya APR BBC, byuzuzaga imikino 4-2 muri rusange.

Mu gace ka mbere, ikipe ya Patriots BBC niyo yagatangiye neza ndetse iza no ku kegukana ku manota 19 kuri 17 ya APR BBC. 

Ikipe ya APR BBC yaje kugabanya amakosa mu gace ka kabiri maze nayo ikegukana ku manota 19 kuri 14 ya Patriots BBC, gusa ku giteranyo, ikipe ya Patriots yari ikiri imbere ku ny’amanota 36 kuri 33.

Ubwo amakipe yari avuye mu karuhuko, ikipe ya APR BBC, ntiyigeze yorohera Patriots BBC kuko yakomeje kuyotsa igitutu ndetse yongera no kwegukana akandi gace (ka gatatu) ku manota 25 kuri 18 ya Patriots.

Mu gace ka kane ari nako ka nyuma, ikipe ya Patriots BBC yaje ku kegukana ku manota 19 kuri 12, gusa ibi ntacyo byayifashije kuko itabashije gukuramo ikinyuranyo cy’amanota yari yashyizwemo na APR BBC.

Nyuma yo kwegukana igikombe cya shampiyona, ikipe ya APR BBC, bivuze ko ariyo izahagararira u Rwanda mu mikino ya Basketball Africa League (BAL 2025).

Si ubwa mbere ikipe ya APR BBC izaba ihagarariye u Rwanda mu mikino ya BAL kuko n’umwaka ushize wa 2023, iyi kipe y’Ingabo z’Igihugu yari muri iri rushanwa gusa ku bw’amahirwe make ntiyabashije kurenga igice cy’amatsinda (conference).

Amafoto: Shema Innocent