Guhera tariki 22-24 Ugushyingo 2024, mu gihugu cya Senegal hazatangira irushanwa rihuza ibihugu mu gushaka itike y’igikombe cy’Afurika (Afro Basket 2025), aho ikipe y’Igihugu y’u Rwanda yamaze kwerekeza aho irushanwa rizabera gusa ikaba igiye kare kuko izabanza gukina imikino ya gicuti.

Mu cyumweru gishize nibwo Federasiyo y’umukino wa Basketball mu Rwanda (FERWABA), yemeje ko ikipe y’Igihugu izabanza gukina imikino ya gicuti mbere yo gutangira irushanwa nyirizina aho bazabanza gukina na Mali tariki 19 ndetse na Sudani y’Epfo tariki 20 Ugushyingo 2024, iyi mikino yose ikazabera mu gihugu cya Senegal ari naho irushwanwa nyirizina rizabera.

Ikipe y’Igihugu y’u Rwanda itozwa na Cheikh Sarr, yari imaze iminsi mu mwiherero yitegura iyi mikino aho yakoreraga muri BK Arena na Petit Stade.

U Rwanda ruri mu itsinda rya gatatu aho ruri kumwe n’ibihugu nka Senegal yakiriye iri rushanwa, Cameroon ndetse na Gabon.

Mu mukino ubanza, u Rwanda ruzahura na Senegal tariki 22 Ugushyingo, rwongere kugaruka mu kibuga tariki 23 Ugushyingo, rukina na Cameroon mu gihe ruzasoreza kuri Gabon tariki 24 Ugushyingo 2024.