#AfroBasket: Perezida Kagame yarebye umukino wahuje u Rwanda na Misiri

Yanditswe na

Sammy Imanishimwe

13-07-2021 - 20:58' | Ibitekerezo ( )

Perezida wa Repubulika y’u Rwanda, Paul Kagame, yitabiriye umukino wahuje u Rwanda na Misiri, mu mikino y’Akarere ka gatanu yo gushaka itike y’imikino ya nyuma ya Afurika mu bagore (FIBA Women’s AfroBasket 2021 Zone 5 Qualifiers). Ni imikino irimo kubera mu Rwanda muri Kigali Arena.

Muri uwo mukino w’umunsi wa kabiri wo gushaka itike ya AfroBasket mu bagore, u Rwanda ntirwabashije kwikura imbere ya Misiri ihabwa amahirwe yo kubona itike, kuko Misiri yatsinze u Rwanda amanota 71 kuri 59.

Ni umukino u Rwanda rwifuzaga kubonamo intsinzi ngo rwizere kuzabona amahirwe yo gukina umukino wa nyuma, aho izegukana igikombe ari yo izahagararira Akarere ka gatanu k’imikino muri Afurika (Zone 5).

U Rwanda rwatangiye neza nyuma ruza gutsindwa

Ikipe y’igihugu y’u Rwanda y’abagore yatangiye neza muri uyu mukino aho igice cya mbere cy’umukino kigizwe n’uduce tubiri cyarangiye u Rwanda ruyoboye n’amanota 39 kuri 29.

Mu duce tubiri twa nyuma, ikipe ya Misiri yaje kwigaranzura u Rwanda birangira yegukanye intsinzi ku manota 71 kuri 59, u Rwanda rukaba rukina umukino wa nyuma kuri uyu wa Gatatu tariki 14 Nyakanga 2021 na Sudani y’Amajyepfo.