#RwandanEpic2024: Umunyarwanda yegukanye isiganwa mu bakina ku giti cyabo (Amafoto)

Yanditswe na

Jean Jules Uwimana

25-10-2024 - 21:57' | Ibitekerezo ( )

Kuri uyu wa Gatanu, mu Karere ka Rubavu hasorejwe isiganwa ry’amagare yo mu misozi ryari rimaze iminsi ine ribera mu Rwanda ku nshuro ya gatanu, Umunyarwanda Tuyizere Etienne, yaryegukanye mu bakina ku giti cyabo.

Ni isiganwa ryo mu misozi ryaberaga mu Rwanda ku nshuro ya gatanu

Uretse Tuyizere wahize abandi mu bakina ku giti cyabo, ikipe y’Ababiligi mu bagabo, ndetse n’Abanya-Espagne mu bakina bavanze bavanze (Umugabo n’umugore), nabo begukanye iri rushanwa muri ibyo byiciro.

Mu duce dutatu twakinwe muri iri siganwa, mu basiganwa ku giti cyabo, Tuyizere Etienne yegukanye Rwandan Epic 2024 akoresheje amasaha 12, iminota 57 n’amasegonda atanu mu gihe ikipe ya y’Ababiligi Orbea, igizwe na Axel Baumans na Pierre de Froidmont nubwo yaje ku mwanya wa kabiri mu gace ka gatatu kahagurukiye I Musanze kagizwe n’Ibilometero 65,5 bagakoreshejemo amasaha abiri n’iminota 42 n’amasegonda 33 ariko birangira begukanye isiganwa muri rusange bakoresheje amasaha 11, iminota 23 n’amasegonda 42.

Abakina nk'ikipe, Ababiligi ni bo begukanye isiganwa

Ikipe ya SUFR 1, igizwe n’Abadage Daniel Gathof na Peter Schermann yegukanye agace ka gatanu bakoresheje amasaha abiri n’iminota 40 n’amasegonda 19 kiyongeraga ku ka kane nako bari begukanye, yaje ku mwanya wa kabiri ku rutonde rusange aho mu irushanwa ryose yakoresheje amasaha 11, iminota 39 n’amasegonda 21.

Ikipe yaje ku mwanya wa gatatu ni iya TLCA2, yari igizwe n’Umunyarwanda, Munyaneza Didier na Banzi Bukhari, aho muri iri rushanwa bakoresheje amasaha 12 n’iminota ine n’amasegonda.

Mu bakina bavanze Abanya-Espagne, Oscar Pujol na Mude Rodriguez ni bo begukanye isiganwa

Mu bakinnyi bakina bavanze umugabo n’umugore, ikipe yari igizwe n’Abaya-Espagne ya Oscar Pujol na Mudw Rodriguez, niyo yegukanye isiganwa ikoresheje amasaha 14, iminota 19 n’amasegonda 30 ikurikirwa n’iyari igizwe n’Abanyarwanda ya Nirere Xaverine na Eric Muhoza, bakoresheje amasaha 14, iminota 39 n’amasegonda 56.

Mu cyiciro cy’abagore, ikipe yari igizwe na Ntakirutimana Martha afatanya n’Umubiligikazi Siska Marrécau, ni bo babaye aba mbere bakoresheje amasaha 16, iminota itatu n’amasegonda 31.