Masengesho Vainqueur na Ingabire Diane begukanye shampiyona y’u Rwanda mu magare (Amafoto)

Yanditswe na

Sammy Imanishimwe

19-08-2024 - 09:23' | Ibitekerezo ( )

Shampiyona y’igihugu y’umukino w’amagare yakinwe mu mpera z’iki cyumweru, yegukanywe Masengesho Vainqueur wa Benediction Club mu bagabo na Diane Ingabire mu bagore

Ku wa Gatandatu tariki 17/08 no ku Cyumweru tariki 18/08 hakinwe shampiyona y’igihugu mu kukino wo gusiganwa ku magare, aho ku wa Gatadatu hakinwe agace ko gusiganwa umuntu ku giti cye (Individual Time Trial), mu gihe ku Cyumweru hakinwe gusiganwa mu muhanda muri rusange (Road Race).

Ku munsi wo ku wa Gatandatu, Mugisha Moise wa Benediction Club ni we wegukanye umwanya wa mbere akoresheje iminota 29’49", akurikirwa na Etienne Tuyizere ndetse na Patrick Byukusenge ba Java Innovotec. Mu bagore, ku mwanya wa mbere haje Ingabire Diane, akurikirwa na Neza viollette Irakoze wa Komera Cycling Team ndetse na Mukashema Josiane wa Benediction Club.

Masengesho Vainqueur wa Benediction Club yegukanye iyi shampiyona mu bagabo

Ku munsi wo ku Cyumweru ni bwo hakinwe umunsi wa kabiri, aho abasiganwa banwe o bamwe bahagurukiye i Kanyinya abandi bahagarukukira kuri Base mu karere Rulindo, bazamuka umusozi wa Tetero mu karere ka Gicumbi.

Bakomereje mu duce twa Gicumbi baninjira mu mujyi waho, banyura mu Rukomo bagaruka mu mujyi wa Kigali aho basoreje i Batsinda mu karere ka Gasabo k’Umujyi wa Kigali. Ni isiganwa ahanini ryaranzwe no guhangana hagati y’abakinnyi ba Benediction Club y’abakinnyi nka Mugisha Moise waje no kugera aho asiga abandi iminota irenga irindwi, ihanganye na Java Innovotec irimo abakinnyi nka Areruya Joseph, Patrick Byukusenge n’abandi.

Abakinnyi bagiye kugera i Kigali Mugisha Moise bamaze kumushikira dnetse baramusiga, isiganwa riza kurangira ku muvuduko wo hejuru ngo batanguranwe kwambuka umurongo, maze Masenegsho Vainqueur wa Benediction Club asoza ku mwanya wa mbere akoresheje 03h20’41".

Ku mwanya wa kabiri haje Niyonkuru Samuel wa Team Amani yo muri Kenya aho yakoresheje 03h20’42", mu gihe ku mwanya wa gatatu haje Etienne Tuyizere wa Java Innotec nawe wakoresheje 03h20’42".

Ingabire Diane yegukanye iyi shampiyona ku nshuro ya gatatu yikurikiranya

Mu bagore (Women/Elite) ku mwanya wa mbere haje Ingabire Diane wakinaga ku giti cye, aho yakoresheje 03h02’34", ku mwanya wa kabiri haje Neza Violette Irakoze wa Komera Cycling Women 03h05’24", naho ku mwanya wa gatatu haje Josiane Mukashema wa Benediction Club wakoresheje 03h05’24".