Mu minsi iyo kipe yamaze muri Turukiya, yahakinnye imikino myinshi ya gicuti n’amakipe atandukanye yo ku rwego rwabo mu myaka, bakaba bazakomereza imyitozo ya nyuma muri Mexique ahagomba kubera irushanwa nyirizina ry’igikombe cy’isi.

Umutoza w’ikipe y’u Rwanda Jean Marie Nsengiyumba avuga ko abona abakinnyi be bari ku rwego yumva yifuzaga, ku buryo bimuha icyizere cyo kuzitwara neza.

Nsengiyumva ati, “Tuvuye aha muri Turukiya ikipe ikina ku buryo numva nifuzaga, iri ku rwego rushimishije kuko n’amakosa bakoraga mbere ajyanye no gutanga imipira (service) ndetse no kuyakira (reception) barayakosoye ubu rwose ikipe imeze neza kandi ndumva izitwara neza”.

Nsengiyumva avuga ko imikino ya gicuti bakinnye ihagije, gusa ngo basigaje gukora imyitozo ya nyuma ku wa gatatu bakimara kugera muri Mexique, bakazatangira irushanwa bucyeye bwaho ku wa kane.

Muri icyo gikombe cy’isi cy’abatarengeje imyaka 19 kizatangiraku wa kane tariki 27/06/2013, ikipe y’u Rwanda izaba iri mu itsinda rimwe n’Ubufaransa, Finland, Iran n‘Uburusiya.

Theoneste Nisingizwe