Aya marushanwa yatangiye uyu munsi tariki 21/01/2012 azitabirwa gusa n’amakipe yo mu turere adasazwe akina muri shampiyona ya Volleyball, ndetse n’abakinnyi basanzwe bakina muri shampiyona ntibemerewe kuzayitabira.

Mu kiganiro ubuyobozi bwa FRVB na Imbuto Foundation bagiranye n’abanyamakuru tariki 19/01/2012, umuyobozi wa FRVB, Uyisenga Charles, yavuze ko iyo mikino itagamije kurwanya malaria gusa ahubwo ko izanabafasha kureba abana bafite impano ya Volleyball bitume bakurikiranwa.

Yabisobanuye atya “Kuba tuzakoresha amakipe yo mu turere kandi adakina shampiyona ni umwanya mwiza wo kwigaragaza ku bana bafite impano ya Volleyball ariko batagira ibibuga byo gukiniraho, bizatuma kandi bigaragaza hanyuma tuzabone uko tubakurikirana”.

Clement Ngoga, umukozi muri Imbuto Foundation, yavuze ko bakoresheje imikino mu gutanga ubutumwa kuko kuba abantu bazajya baza ari benshi kureba iyo mikino bazajya bahatanga ubutumwa bwo kwirinda malaria burusheho kumvikana.

Aya marushanwa azatwara ingengo y’imari ya miliyon 16 n’ibihumbi 330, aratangirira mu ntara y’Iburengerazuba mu karere ka Rubavu kuri uyu wa gatandatu.

Tariki 28/01/2012, amarushanwa azabera mu karere ka Huye mu ntara y’Amajyepfo, naho tariki 29/01/2012 amarushanwa abere i Rwamagana mu ntara y’Iburasirazuba.

Theoneste Nisingizwe