Serumogo Ally yongereye amasezerano muri Kiyovu Sports

Yanditswe na

Jean Jules Uwimana

25-06-2022 - 22:36' | Ibitekerezo ( 1 )

Kuri uyu wa Gatandatu tariki 25 Kamena 2022, ikipe ya Kiyovu Sports yongereye amasezerano myugariro wayo Serumogo Ally Omar, ukina inyuma ku ruhande rw’iburyo.

Serumogo Ally umaze imyaka 4 akinira Kiyovu Sports yongereye amasezerano

Uyu musore byavugwaga ko yifuzwa n’amakipe atandukanye, nyuma yo kwitwara neza muri shampiyona ya 2021-2022, yasinyiye Kiyovu Sports amasezerano mashya y’imyaka ibiri iri imbere ayikinira.

Nyuma yuko uwo musore yongereye amasezerano, Perezida wa Kiyovu Sports Mvukiyehe Juvenal, abinyujije ku mbuga nkoranyambaga ze yagize icyo abwira abamwifuzaga, avuga ko bamubabaje.

Yagize ati “Harya ngo murashaka Serumogo, umukinnyi? Murambabaje.”

Serumogo Ally umaze imyaka ine akinira Kiyovu Sports, dore ko yayigezemo mu 2018, muri shampiyona irangiye ya 2021-2022 mu mukino w’umunsi wa 28 yashimiwe na Kiyovu Sports mu mukino banganyije na Etoile del’Est 1-1, nyuma yuko yari yujuje imikino 110 ayikinira.