Ni ikipe igizwe n’abasore n’abagabo bose bahuje ikibazo cyo kubura ingango z’umubiri, buri gihe biha gahunda yo guhura bagakora imyitozo bakina umupira w’amaguru, aho bitegura gukina amarushanwa nandi makipe.

Ntibaragira amahirwe yo kugera ku mukino wa nyuma w’amarushanwa nibura ngo batsindwe, kuko buri gihe baviramo muri kimwe cya kabiri, kubera kubura amikoro abavana Rubavu akabageza ahakinirwa.

Mugwiza Jean Nepo umutoza w’ikipe y’amaguru y’abafite ubumuga mu karere ka Rubavu, avuga ko bibaye ku nshuro ya kabiri baviramo muri kimwe cya kabiri kubera ubushobozi.

“Twatewe mpaga kubera twabuze mu mukino wa kimwe cya kabiri wagombaga kubera i Kigali, abakinnyi bari biteguye ariko tubura ubushobozi butugeze Kigali tuvamo dutyo.”

Mugwiza avuga ko bari basanzwe bafashwa na Vision Jeunesse nouvelle yabahaga imodoka ariko kuri uwo munsi yababwiye ko badafite ubushobozi bwo kubafasha ntibajya gukina.

Harelimana ni umwe mubakina muri iyi kipe y’abafite ubumuga, avuga ko bibabaza kuba bikora kumufuka ngo bashobore kugira icyo bakora akarere kakabatererana.

“Urabona nkaha udusanze, abandi barakina bakagira amazi yo kunywa, abandi barakina bakagira ibyo bafata bibagarurira imbaraga ariko twe, twikora ku mufuka, iyo tubibuze turihangana, nyamara dufite umuhate wo kwitwara neza no guhagararira akarere kacu ariko ntikatwitaho.”

Donatien Nsengimana umuyobozi wungirije muri RAFA ishyirahamwe ry’abafite ubumuga bakina umupira w’amaguru, avuga ko ikipe y’akarere ka Rubavu bahabwaga inkunga y’imodoka na Vision Jeunesse bo bagatanga essence ariko ku gihe cyo gukina umukino wa kimwe cya kabiri habuze ubushobozi.

Nsengimana avuga ko akarere ka Rubavu ntacyo gafasha ikipe kandi babandikiye kenshi babasaba gufasha iyi kipe kakavuga ko gafite ingengo y’imari idahagije.

“Utundi turere dufasha amakipe, ariko akarere ka Rubavu ntacyo gakora, twakandikiye tugasaba gufasha ikipe ariko ntikagira icyo gakora, twagiye no kukareba ariko nta gisubizo baduhaye.”

Kigali Today yavuganye n’umujyanama uhagarariye abafite ubumuga mu nama njyanama y’akarere ka Rubavu, Jeannnette KAGABA avuga ko ikibazo gihari ari ingengo y’imari idahagije, nyamara si rimwe, kabiri cyangwa gatatu ikipe y’amaguru y’abafite ubumuga isabye akarere kubafasha ntiyite ku byifuzo byabo.