KT TV
Rayon Sports yujuje imikino itatu itabona intsinzi, Mukura ikura amanota i Rusizi
Imikino y’umunsi wa munani wa shampiyona y’icyiciro cya mbere yatangiye gukinwa ku wa Gatanu yakomezaga kuri uyu wa Gatandatu tariki 11 Ukuboza 2021 hakinwa imikino 3 yaranzwe no kwihagararaho kw’amakipe yari yakiniye hanze.
Kuri sitade ya Kigali i Nyamirambo, ikipe ya Rayon Sports iheruka guhagarika by’agateganyo umutoza wayo Masudi Djuma yari yakiriye ikipe ya Gorilla FC, umukino watangiye utinze kubera ko Gorilla FC yari yambaye imyenda isa n’iya Rayon Sports umusifuzi akabategeka gushaka indi myambaro. Bahise bajya kugura imyenda itukura ari na yo bakinanye.
Saa cyenda n’iminota 28 nibwo umukino wari utangiye, Rayon Sports itangira itabonana neza mu gihe ikipe ya Gorilla FC binyuze ku basore bayo barimo Irankunda Rodrigue, Duru Mercy Ikena na Simeon Iradukunda yageragezaga uburyo butandukanye.
Bahereje imipira rutahizamu Mohamed Camara biza no kuvamo imipira y’imiterekano 2 na koruneri 2 mu minota 30 y’igice cya mbere. Icyakora Rayon sports yaje gutangira kubonana maze binyuze ku mupira wahinduwe neza na Nizigiyimana Karim Mackenzie anyuze ku ruhunde rw’iburyo, rutahizamu Rudasingwa Prince yaboneye ikipe ya Rayon sports igitego cya mbere ari nako igice cya mbere cyarangiye.
Mu gice cya kabiri amakipe yombi yagiye akora impinduka mu kibuga ari nako agerageza uburyo butandukanye bwavamo ibitego. Byatumye ku munota wa 75 ku mupira Duru Mercy Ikena wa Gorilla FC yambuye Iranzi Jean Claude akawuzamukana ku ruhande rw’iburyo maze awuhinduye neza rutahizamu Mohamed Camara wari wagiye agerageza uburyo butandukanye mu mukino abonera Gorilla FC igitego cyo kwishyura, umukino urangira amakipe yombi anganyije igitego 1-1 bituma Rayon Sports isarura amanota 2 mu manota 9 ahwanye n’imikino 3 iheruka gukina.
Mu yindi mikino, mu Karere ka Rusizi, ikipe ya Espoir FC yari yakiriye Mukura Victory Sports maze Mukura ibifashijwemo na Mugisha Patrick ku munota 26 w’umukino ayitsindira igitego kimwe rukumbi cyabonetse muri uyu mukino ibona amanota 3 y’umunsi wa 8 itsinze Espoir FC igitego 1-0. Ni mu gihe Gicumbi FC na yo ku kibuga cyayo mu Karere ka Gicumbi yatsinzwe na Marines FC igitego 1-0 cyatsinzwe na Ishimwe Fiston ku munota wa 79.
Kuri iki Cyumweru tariki 12 Ukuboza 2021 hateganyijwe imikino itatu isoza umunsi wa 8 wa shampiyona. APR FC iheruka gutakaza amanota mu mukino w’ikirarane kuri sitade ya Kigali i Nyamirambo irakira Bugesera FC. Uyu mukino kuri iyi sitade urabanzirizwa ku isaha ya saa sita n’igice n’umukino uhuza Kiyovu Sports na Gasogi United mu gihe mu Karere ka Rubavu kuri sitade Umuganda ikipe ya Etincelles FC yakira AS Kigali.
Ibitekerezo ( 1 )
Ohereza igitekerezo
|
|
Komerezaho kbsa bro