Ibi KNC yabitangarije mu kiganiro n’itangazamakuru, agaragaza ko kudashyira hamwe kw’abayobora amakipe ariyo ntandaro y’idindira ry’iterambere ry’umupira mu Rwanda.

Yagize "Ku bijyanye n’ubucuruzi, tumeze nk’abantu batandukanye ntabwo tuzi icyo dushaka kuko birababaje uyu munsi kuba turi mu tuntu tw’amafuti. Abayobozi b’amakipe yo mu cyiciro cya mbere ntabwo twari twahura ngo dukore inama yo gutekereza aho twifuza kujyana iterambere rya ruhago n’ubucuruzi bwayo."

Kuri iyo ngingo, KNC yakomeje avuga ko biteye agahinda kuba kugeza ubu amakipe atabyaza umusaruro umupira nk’igicuruzwa amakipe afite cyabyara inyungu.

Ati "Birakwiye ko dutekereza uburyo amakipe dufite agomba gutungwa n’igicuruzwa dufite cyitwa umupira. Biteye isoni n’agahinda kuba shampiyona y’u Rwanda yerekanwa ku buntu ariko ukabona aba perezida ntacyo bitubwiye, ni ngombwa ko twese dushyira hamwe."

KNC uyobora Gasogi United avuga ko ibyo kuba Leta ishyira amafaranga menshi mu mupira biri mu Rwanda gusa, nyamara bitanatanga umusaruro kuko hari igihe kizagera ntikomeze kuyashoramo, bityo ko amakipe akwiriye gutekereza uko yatungwa n’umupira, byose ngo byaturuka mu gushyira hamwe kw’abayobozi bayo.