KT TV
Marine FC itsinze APR FC bwa mbere mu mateka
Mu mukino wo kwishyura wa 1/4 cy’Igikombe cy’Amahoro wabereye kuri sitade ya Kigali i Nyamirambo kuri uyu wa Gatatu tariki 04 Gicurasi 2022 ,ikipe ya Marine FC yakoze amateka itsinda APR FC bwa mbere ariko Marine FC isezererwa ku giteranyo cy’ibitego 2-1.
Ni umukino APR FC yakiriyemo Marine FC yizigamiye ibitego 2-0 yari yatsindiye Marine FC mu rugo kuri sitade Umuganda mu Karere ka Rubavu. Ukurikije abakinnyi APR FC isanzwe ibanza mu kibuga, umutoza yari yakozemo impinduka imwe aho umunyezamu Ishimwe Pierre ari we utakinnye kuri uyu mukino ari ku ntebe y’abasimbura, asimburwa na Ahishakiye Hertier.
Ikipe ya Marine FC yitwaye neza muri uyu mukino muri rusange. Yabonye igitego kimwe rukumbi cyabonetse muri uyu mukino ku munota wa 64 gitsinzwe na Mugiraneza Frodouard ku ishoti yateye mu izamu, umunyezamu Ahishakiye Hertier ntiyabasha kuwukuramo.
Ni ubwa mbere kuva ikipe ya Marine FC yazamuka mu cyiciro cya mbere itsinze APR FC mu mikino y’amarushanwa kuko ahandi hose bahuriraga igikomeye Marine FC yakoraga kwabaga ari ukunganya mu gihe ariko tariki ya 10 Gashyantare 2019 Marines FC yatsinze APR FC mu mukino wa gicuti wabereye i Shyorongi ibitego 3-2.
APR FC yakomeje muri 1/2 cy’Igikombe cy’Amahoro isezereye Marine FC ku giteranyo cy’ibitego 2-1. Biteganyijwe ko izahura n’ikipe ya Rayon Sports yo yasezereye Bugesera FC iyitsinze ibitego 3-2 mu mikino ibiri.
Ibitekerezo ( 1 )
Ohereza igitekerezo
|
|
APR BAKINAGANABI HARIYA HANU ARIKO BAGUTWAYE UMUKINNYI WACU.