Aherekejwe n’umutoza w’Amavubi, Milutin Micho, Ntagungira yamaranye umwanya mu biganiro na Gasana Mohammed Tchité ukinira Standartd de Liège, ariko uyu musore washatswe kuva cyera n’u Rwanda amubwira ko bitashoboka kuko agishakisha uko yazakinira Ububiligi gusa ngo hari byinshi yafasha mu iterambere ry’umupira w’u Rwanda nubwo atakinira Amavubi.

Undi mukinnyi Ntagungira yaganiriye na we, ni Kevin Monnet Paquet bakuze kwita ‘KMP’ ukinira FC Lorient mu Bufaransa, na we akaba ashakwa cyane n’u Rwanda ngo azakinire Amavubi bitewe n’ubuhanga afite.

Nubwo uyu musore ufite se w’Umufaransa na nyina w’Umunyarwandakazi yakiniye ikipe y’Ubufaransa y’ingimbi, Ntagungira avuga ko hari icyizere kinini cy’uko uyu musore ukina asatira yazakinira u Rwanda kuko mu biganiro bagiranye yamwijeje rwose ko bishoboka, gusa ngo byose bizaterwa na se umubyara witwa Jean Michel Monnet Paquet.

Ibi bishobora kuzatanga umusaruro kuko ngo Abega yamaranye umwanya munini mu Bufaransa aganira na se wa KMP kandi ngo yamwijeje ko umuhungu we azakinira u Rwanda.

Mu bandi bakinnyi yasuye mu cyumweru yamaze ku mugabane w’uburayi, harimo Henry Munyaneza ukina muri SK St. Niklaas mu Bubiligi, Elias Uzamukunda ukina muri AS Cannes na Bonfils Kabanda ukinira AS Nancy mu gihugu cy’Ubufaransa.
Aba yabasuye mu rwego rwo kureba uko bahagaze kugirango bazitabazwe mu mukino itandukanye amavubi ategura dore ko bo bamaze gukinira ikipe y’igihugu.

U Rwanda rufitanye umukino na Nigeria tariki 29/02/2012 i Kigali, mu rwego rwo gushaka itike yo kuzajya mu gikombe cy’Afurika kizabera muri Afurika y’Epfo muri 2013.

Theoneste Nisingizwe