Ishyirahamwe ry’umupira w’amaguru muri Kenya (FKF) ryafashe umwanzuro wo gutanga igikombe cya shampiyona 2019/2020 kubera ko nta cyizere cy’uko shampiyona izakomeza kubera Coronavirus.

Nk’uko ikinyamakuru Goal kibitangaza, Umuyobozi w’ishyirahamwe ry’umupira w’amaguru muri Kenya Nick Mwendwa yandikiye Impuzamashyirahamwe ku mugabane wa Africa CAF ayimenyesha ko Gor Mahia izahabwa igikombe.

Uyu muyobozi aganira na Goal.com dukesha iyi nkuru yagize ati" Ni gute wapanga imikino 10 cyangwa 11 yari isigaye mu gihe tutazaba dukina umupira mu kwezi kwa Gatanu n’ukwa Gatandatu ? Ntibizashoboka "

" Abakinnyi bari mu rugo ntibaza ku bibuga ngo bitoze, ni gute wabona iminsi wakiniramo iyi mikino ? Gor Mahia igomba guhabwa igikombe cya shampiyona 2019/2020. Tuzatanga izina ryayo muri CAF ku wa Gatanu w’iki cyumweru nta mpaka zigomba kuri iyi ngingo rwose"

Uretse Gor Mahia yahawe igikombe ikipe ya Nairobi City Stars ya mbere mu cyiciro cya kabiri na Bidco United ya kabiri zazamuwe mu cyiciro cya mbere.

Ikipe ya 16 mu cyiciro cya mbere izakina kamarampaka n’iya gatatu mu cyiciro cya kabiri Vihiga united kugira ngo haboneke iyiyongera kuyazamutse

Shampiyona muri Kenya yahagaze igeze ku munsi wa 23 ku rutonde rwa shampiyona Gor Mahia iri ku mwanya wa mbere n’amanota 54 ikurikiwe na Kakamega Homeboyz ifite amanota 47.

Amakipe abiri ariyo Chemel na Sonny Sugar zigomba kumanuka mu cyiciro cya kabiri.