Ni umukino ikipe ya Petro de Luanda yo muri Angola yatangiye neza iminota itanu ya mbere y’agace ka mbere gusa irangira Al Ahly Ly yo muri Libya ariyo iyoboye n’amanota 14-11 ariko iminota icumi ikagize muri rusange irangira Petro de Luanda igatsinze ku manota 26-24.

Al Ahly Ly agace ka kabiri yakinjiranyemo imbaraga zidasanzwe itsindamo amanota 28 Petro de Luanda ifitemo 14, bituma igice cya mbere kirangira iyi kipe yo muri Libya iri imbere n’amanota 52-40.

Petro de Luanda yaje mu gace ka gatatu nayo ifite imbaraga nyinshi igatsindamo amanota 35 mu gihe Al Ahly Ly yatsinzemo amanota 23 byari bivuze ko uduce dutatu twari turangiye iyi kipe yo muri Angola ifite amanota 75-70. Iyi kipe yari yaratsindiwe ku mukino wa nyuma mu 2022 mu gace ka kane ari nako ka nyuma yakomeje kugaragaza imbaraga.

Iyi kipe ya Petro de Luanda ibifashijwemo na Nicholas Faust watsinze amanota menshi (24) muri iyi mukino mu gace ka nyuma yatsinzemo amanota 32-24, umukino muri rusange urangira ariyo inatwaye igikombe cya Basketball Africa League yabaga ku nshuro ya kane itsinze ku manota 107-94.

Mu mukino wo guhatanira umwanya wa gatatu wabaye ku wa 31 Gicurasi 2024, ikipe ya Rivers Hoopers yo muri Nigeria niyo yawegukanye itsinze Cape Town Tigers yo muri Afurika y’Epfo amanota 80 kuri 57.

Iyi mikino yaberaga mu Rwanda kuva tariki 24 Gicurasi 2024 aho yahereye mu mikino yo gushaka uko amakipe azahura muri 1/4.