Kwamamaza

Patriots BBC yatsinze JKT ku mukino wa mbere wa Basketball Africa League

Guhera ku wa kabiri tariki ya 17 Ukuboza 2019 muri Kigali Arena hatangiye amajonjora ya kabiri ya Basketball Africa League, mu gice cy’Iburasirazuba. Ikipe ya Patriots BBC yatangiranye intsinzi mu mukino wa mbere aho yatsinze JKT (Jeshi La Kujenga Taifa) amanota 113 kuri 61.

Ni umukino usa nk’aho woroheye Patriots BBC dore ko yatsinze agace ka mbere amanota 34 kuri 17.

Agace ka kabiri Patriots BBC yakomeje kuzamura amanota maze igatsindamo amanota 24 kuri 17 ya JKT. Agace ka gatatu Patriots BBC yakomeje kwerekana imbaraga zidasanzwe ibifashijwemo na Kenny Gasana na Ndizeye Dieudonné n’abandi.

Ikipe ya JKT yo muri Tanzania yanyuzagamo igatsinda binyuze kuri Baraka Sadick wanatsinze amanota menshi mu mukino. Aka gace karangiye Patriots BBC igatsinzemo amanota 24 kuri 16 ya JKT.

Agace ka kane ari na ko kanyuma, wabaye umwanya wo gushimisha abafana bari bitabiriye uyu mukino. Abakinnyi nka Sagamba Sedar na Jean Victor Mukama bashimishije abitabiriye umukino. Patriots BBC yatsinze amanota 34 kuri 17 ya JKT, umukino urangira intsinzi itashye mu Rwanda.

Ikipe ya Patriots BBC yitwaye neza
Ikipe ya Patriots BBC yitwaye neza

Nyuma y’umukino, umutoza wa Patriots BBC Carey Francis Odhiambo yavuze ko umukino waboroheye kandi byari ngombwa ko batangirana intsinzi.

Umutoza wa Jeshi La Kujenga Taifa (JKT) Alfred Makoye yavuze ko batunguwe n’uburyo batsinzwemo, yongeraho ko ikipe ye yakinnye umukinnyi ku giti cye.

Abakinnyi 12 Patriots BBC iri gukoresha muri Iyi BAL ni Nijimbere Guibert, Sagamba Sedar, Kenny Gasana, Adarius Lemar Pegues, Steven Hagumintwari, Jean Victor Mukama, Ally Ruzigande, Ndayisaba Dieudonné, Aubin Junior Kasongo, Elie Kaje, Aristide Mugabe (Kapiteni) na George Wirbert Blakeney.

Kenny Gasana yatsinze amanota 21 muri uyu mukino
Kenny Gasana yatsinze amanota 21 muri uyu mukino

Muri uyu mukino, Baraka Sadick Athumani ukinira JKT ni we watsinze amanota menshi ahol yatsinze amanota 29, mu gihe uwamukurikiye yabaye Gasana Kenneth wa Patriots BBC watsinze amanota 21.

Uko imikino yose yagenze:

Patriots BBC 114-61 JKT
Ferroviário de Maputo 74- 59 Cobra Sport
GNBC 78-75 Unza Pacers

Jeshi la Kujenga Taifa
Jeshi la Kujenga Taifa

MENYA UMWANDITSI

kigalitoday android app mobile

Ibitekerezo  

Ohereza igitekerezo

Igitekerezo cyanyu kiragaragara kuri Kigali Today nyuma y'isuzuma kandi mu gihe kidatinze. Udashaka ko izina ryanyu rimenyekana wakoresha alias, Turabashimiye.

Amakuru aheruka