Nk’uko Munyaneza Leonidas uhagarariye Coopte Mulindi abitangaza avuga ko babonye formulaire kuri Web site barayuzuza ndetse bakora umushinga wo guhinga icyayi kuri hegitari 113 no kucyuhira maze umushinga witwa United State African Development Foundation w’Abanyamerika ubaha inkunga ingana na miliyoni 133.

Iki cyayi ni icya Coopte Mulindi yahinze mu mafaranga yabonye ibikesheje kwifashisha internet.

Nyuma bakomeje gukorana neza n’uwo mushinga maze baza kugirana amasezerano ko ayo mafaranga bazayishyura yose nyuma bakomeje kugenzura basanga uwo mushinga wabo ari mwiza hanyuma bababwira ko miliyoni 90 arizo babahaye kuzabafasha mu bikorwa byabo ko batazayishyura.

Ayasigaye bakoze andi masezerano yo kuzayishyura bayafashisha amashyirahamwe n’andi makoperative aciye bugufi nibwo batangiye gufasha nabo abatishoboye bababumbira mu zindi koperative.

Ngendabanga Jerome uhagarariye abahinzi b’icyayi muri cooperative ya Coopte Mulindi avuga ko nyuma yo gusonerwa ayo mafaranga bahise batera inkunga andi makoperative y’abatishoboye.

Abaterankunga bari baje kureba aho ibikorwa bya coopte Mulindi bigeze

Ikindi avuga nuko abaterankunga babo barabashimye intambwe bamaze gutera kuko ayo makoperative yose bateye inkunga ubu amaze gutera imbere.

Koperative Kogasha yahise iterwa inkunga na coopte Mulindi inkunga ya miliyoni 3 n’ibihumbi 500 nabo batangira gutunganya ingemwe z’imbuto.

Abaterankunga basuye n’izindi koperative zatewe inkunga na Coopte Mulindi.

Mukankera Athanasie umwe mu banyamuryango b’iyi koperative avuga ko mbere bari bafite ikibazo cy’ubukene ariko nyuma bamaze kubona iyi nkunga ubu buri munyamuryango wese afite itungo yoroye ndetse akagira n’imigabane muri iyo koperative.

Avuga ko bateganya no kuzoroza kuri ayo matungo abatishoboye bo mu murenge wa Kaniga nabo bakivana mu bukene.

Ernestine Musanabera