Mu mpera z’umwaka wa 2014 nibwo Guverinoma y’u Rwanda n’isosiyete ikomeye y’itumanaho y’Abanyakoreya (Korea Telecom), batangije umuyoboro wa interineti ya 4G LTE, uzatuma u Rwanda rushobora kugira interineti yihuta, ishobora kugera ku bantu benshi kandi ihendutse.

Umushinga wo gukwirakwiza umuyoboro wa 4G LTE mu Rwanda waherewe igihembo mu gihugu cy’u Bwongereza mu Mujyi wa London ku wa Gatatu tariki ya 13 Gicurasi 2015; mu bijyanye no guhanga udushya mu bucuruzi bw’ikoranabuhanga ry’itumanaho.

Uyu mushinga washimwe kubera gahunda yawo y’ubucuruzi igendeye ku bufatanye bw’abikorera ndetse na leta, no kuba uyu muyoboro usakara ku buryo bwihuse dore ko uzaba wamaze gukwirakwizwa hirya no hino mu gihugu ku kigero cya 95 ku ijana bitarenze umwaka w’2017.

Nyuma yo kubona iki gihembo, Minisitiri w’Urubyiruko n’Ikoranabuhanga (MYICT), Jean-Philbert Nsengimana, yagize ati “Guverinoma y’u Rwanda irashimira ikigo cya Korea Telecom ku bw’iki gihembo, ndetse by’umwihariko turashimira Perezida Paul Kagame ku bw’icyerekezo cye cy’uko ikoranabuhanga rikomeza guteza imbere igihugu, tukaba dukomeza gukangurira abatanga za serivisi ziva ku muyoboro mugari gukomeza kuzisakaza mu kuzamura ubukungu no gufasha Abanyarwanda”.

Uku gushyiraho uyu muyoboro wihuse bizakomeza gufasha kwihutisha ikoranabuhanga mu Rwanda, guhanga imirimo ndetse no kuzamura iterambere ry’imibereho myiza n’ubukungu muri rusange.

Iki gihembo kije kandi nyuma y’iminsi mike icyegeranyo cyasohowe n’Ihuriro Mpuzamahanga ry’Ubukungu cyerekana uko Ikoranabuhanga ryitabirwa gukoreshwa hirya no hino ku isi (The Global Information Technology Report) cyasohotse muri 2015 gishyize u Rwanda ku mwanya wa mbere ku isi mu guteza imbere ikoranabuhanga mu kuzamura imibereho myiza n’ubukungu muri rusange.

Inkuru ya Migisha Magnifique, ushinzwe itumanaho muri MYICT