Ibi yabitangarije mu muhango wo gutangiza amahugurwa ku gukoresha imbuga nkoranyambaga za Facebook na Twitter no kwitabira serivisi zitangwa hakoreshejwe ikoranabuhanga wabereye mu karere ka Kamonyi tariki 02/02/2012.

Aya mahugurwa arabera ku kigo cy’ubucuruzi n’iterambere (BDC) giherereye mu kagari ka Nkingo ho mu murenge wa Gacurabwenge no mu modoka y’ikoranabuhanga irimo mudasobwa, agamije gufasha Abanyakamonyi gutinyuka ikoranabuhanga, dore ko bamwe bibwiraga ko ari iby’abanyamujyi gusa.

Minisitiri Gatare yasobanuye ko ikoranabuhanga, by’umwihariko imbuga Facebook na Twitter, ari ikiraro gihuza abaturage n’abayobozi maze bagahana amakuru ku buryo bwihuse. Yatanze urugero kuri Nyakubahwa Perezida wa Repubulika kuko akunze gukoresha Twitter aho ahurira na bamwe mu baturage bakamugezaho ibitekerezo byabo.

Umuyobozi w’akarere ka Kamonyi, Rutsinga Jacques, atangaza ko izo mbuga zishobora guhurirwaho n’abantu benshi mu gihe kimwe zizafasha abayobozi batandukanye bakorera mu karere ka Kamonyi kungurana ibitekerezo. Aragira ati “Bizagabanya inama kuko tuzajya duhura aho biri ngombwa”.

Ku bwa Minisitiri Gatare, ikoranabuhanga ryunganira inzego zose z’ubuzima bw’igihugu rikagira umwihariko wo kwihutisha iterambere no gusangiza abantu benshi amakuru mu gihe gito. Ku bw’iyo mpamvu muri uwo muhango hatumiwe n’amasosiyeti asanzwe atanga serivisi akoresheje ikoranabuhanga kugirango batangarize abaturage imikorere yabo.

Amasosiyeti nka MTN Rwanda, Tigo, Banki y’abaturage ndetse na EWSA nayo yasobanuriye abari aho uburyo umuntu ashobora kubona serivisi zitandukanye akoresheje ikoranabuhanga rya telefoni igendanywa. Gutanga serivisi hifashishijwe iryo kuranabuhanga bigabanya umurongo w’abantu haba kuri Banki cyangwa se aho bagurira umuriro.

Amahugurwa ku ikoreshwa ry’imbuga nkoranyambaga azamara iminsi ibiri hakaba hateganya guhugura abanyamabanga Nshingwabikorwa b’imirenge yose igize akarere ka Kamonyi, abahagarariye inzego z’urubyiruko n’iz’abagore, abacungamutungo b’imirenge Sacco ndetse n’abandi baturage bose babyifuza.

Umunyamabanga Nshingwabikorwa w’umurenge wa Gacurabwenge, Umugiraneza Marthe, avuga ko gukoresha ikoranabuhanga bizabafasha kwitangira akazi kurushaho. Ati “ubundi hari igihe byabaga ngombwa ko umuntu ahagarika akazi akajya gushaka serivisi runaka. Nk’abakozi bakaga impushya ngo bajye kuri banki”.

Abaturage nabo babona ko ikoranabuhanga ribafitiye akamaro kuko abenshi muri bo bafite telefoni bityo nk’uwaba akeneye koherereza umwana amafaranga ku ishuri akaba yakoresha telefoni.

Marie Josee Uwiringira