Uyu musore utarageze mu ishuri avuga ko atemeranywa n’abavuga ko umuntu wize ari we ushobora kugira icyo akora cyamuteza imbere.

Yagize ati “Kwiga ni byiza ariko bidashobotse umuntu yahimba kandi bigakunda. Jye nabonye ubukene bumereye nabi, mpimba imitwe kandi icamo. Ncanira abantu mu nzu nkoresheje ibikoresho bishaje, ampule n’amabuye ya radio. Ntaho nabyize ni ubwenge bwanjye Imana yampaye”.

Uyu musore avuga ko gukora uwo muriro byamufashije kubaka inzu ifite agaciro ka miliyoni imwe n’igice, yabashije kwiguriramo inka eshatu n’ihene ndetse umwishyurira mituweri. Safari kandi ubu ngo yiihira ishuri kuko yabonye aho akura agarafaranga.

Ashyira umuriro mu nzu z’abantu akoresheje ampule n’amabuye ya radio byashaje

Abacana uwo muriro bo bavuga ko waborohereje ngo kuko petrole yarabahendaga kandi ishobora no kubateza uburwayi mu myanya y’ubuhumekero.

Maniragaba, utuye mu umurenge wa Base, akagari ka Bugaragara yagize ati “jye mu rugo rwanjye dukoresha uyu muriro, kandi niwo nabonye ushobora guhenduka. kubishyira mu nzu ampule imwe ayikorera icyatanu, kandi ushobora gucana igihe cyose , n’iyo warara ucanye itara nta kibazo. Iwanjye nkoresha ampule 4”.

Nyiransabimana nawe ngo ni wo muriro acana nyuma yo kubona ko agatadowa gashobora kumuteza ibibazo.

Yagize ati “jye nacanaga agatadowa mbonye ukuntu peteroli uyicana ikazana ibyotsi byinshi mu nzu abana bakabayihumeka, ubwo mpitamo gukoreha uyu muriro”.

Ngo uyu muriro ushobora kuwukoresha buri munsi igihe icyo ari cyo cyose. Ngo iyo bawushyize mu nzu, ubwo ni twibanire kugeza igihe bashakiye.

Hortense Munyantore