Guhera tariki ya 1/2/2014, iminara ya Rebero na Jali, yari isanzwe ikoreshwa mu kohereza amajwi n’amashusho kuri televiziyo ntizongera gukoreshwa, ku buryo abazaba badafite decoders batazabasha kureba televiziyo.

Mu kiganiro n’abanyamakuru kuri uyu wa Kabiri tariki 28/1/2014, Gatarayiha Regis, umuyobozi wa RURA yatangaje ko ubu buryo buje gukemura ikibazo cy’uburyo amajwi n’amashusho bigera kure kandi bigaragara neza kuri televiziyo.

ORINFOR yabaye RBA ngo yageraga ahantu hatageze kuri 45% ariko mu buryo bushya bwa digital ngo isigaye igera kuri kuri 95% by’ahantu hatuwe; nk’uko umuyobozi wa RURA yabisobanuye.

Umuyobozi wa RURA, Regis Gatarayiha, (ufite micro) mu kiganiro n’abanyamakuru.

Yakomeje avuga ko kugeza ubu bagihura n’imbogamizi ko Abanyarwanda bataragira imyumvire ihamye yo kumva ko ubu buryo bwashyiriweho kubafasha kubona serivisi nziza za televiziyo na Radio.

Ku kibazo cy’ibiciro bigihanitse na bamwe mu baturage badashobora kubona ubushobobozi bwa kwigurira izo decoders, Gatarayiha yasubije ko bazakomeza kuganira n’amabanki n’ibigo by’imari ziciriritse ku buryo zakoresha uburyo bw’inguzanyo.

Gahunda yo gukuraho uburyo bwa analogue busanzwe bukoreshwa mu kwakira amashusho n’amajwi kuri televiziyo izahera ku turere twa Gasabo, Kicukiro, Gakenke, Nyarugenge, Muhanga, Rulindo, Kayonza, Kamonyi, Rwamagana na Bugesera.

Tariki 31/3/2014 hazakurikiraho uturere Burera, Gekenke, Nyarugenge, Karongi, Ruhavu, Rutsiro, Ngoma, Kirehe, Rwamagana na Kayonza.

Emmanuel N. Hitimana