“Dushingiye ku ngero zimwe na zimwe zo mu Rwanda nk’igishanga cya Rugezi cyigeze gukama kigateza ibura ry’amashanyarazi mu gihugu, ishyamaba rya Gishwati ryari rigiye gucika, cyangwa se n’akabande ka Nyandungu (Kigali) ubu kongeye kugarukamo inyange; dushobora gukora ibirenzeho”, nk’uko Dr Rose Mukankomeje yasobanuye.

Uyu muyobozi mukuru w’ikigo gishinzwe kubungabunga ibidukikije (REMA) yabwiye abitabiriye inama ibera i Kigali kuva kuri uyu wa gatatu tariki 07/8/2013, ko mu Rwanda kimwe nk’ahandi ku isi, hakwiye gutezwa imbere ingufu zidashira kandi zidahumanya ibidukikije, nk’iziva ku ngomero z’amashanyarazi, imirasire y’izuba, umuyaga n’izindi.

Abitabiriye inama mpuzamahanga yiga ku bidukikije, ingufu n’iterambere, irimo kubera i Kigali.

Ati: “Peterori n’inkwi (bihumanya kandi bigashira), biraduhenda cyane, ingufu dufite rero nk’iz’amazi tugomba kuzibungabunga dutera amashyamba, kugira ngo imvura ihore iboneka. Dukwiye no gukurikiza ibishushanyo mbonera by’imikoreshereze y’ubutaka, iby’imiturire, kugirango tugere ku iterambere rirambye”.

Iyo nama mpuzamahanga yatumiwemo na Ministeri ishinzwe imicungire y’ibiza no gucyura impunzi (MIDMAR), aho Minisitiri Seraphine Mukantabana yagaragaje ibiza by’inkangu n’imyuzure byahitanye abantu bikangiza byinshi mu minsi ishize, nk’ingaruka zatewe n’imihindagurikire y’ibihe; akaba asaba inama z’uburyo u Rwanda rwakwitwara muri iki kibazo.

Ministiri Mukantabana yagize ati: “Iyi nama irafasha abakozi ba Ministeri yacu bashinzwe imicungire y’ibiza no kuburira abantu, bakaba bazayungukiramo tekiniki z’imikorere mishya; kandi ni amahirwe menshi ko INILAK irimo gushyiraho imyigishirize yo kubungabunga ibidukikije mu Rwanda, navuga ko ari ikintu gishya kuri twe”.

Ingomero z’amazi zitanga amashanyarazi, ni zimwe mu ngufu zidashira kandi zidahumanya ibidukikije, zikaba ngo zigomba kwitabaho.

Prof. Ajetomobi Joshua wavuye mu gihugu cya Nigeria, we yasobanuye ko iwabo batangiye kugira ingaruka mbi ziterwa n’imyuzure n’amapfa kuva kera, ariko ngo bihutiye gushyiraho ikigega cyo guhangana n’ibiza ndetse no gushakisha ingamba zo guhangana n’ibyo biza.

Ishuri rya INILAK ryatumije iyi nama yitabiriwe n’impuguke mu bumenyi bw’isi no kurengera ibidukikije, ziturutse mu bihugu nk’u Bushinwa, Hong Kong, Austria, Nigeria, Tanzania n’ahandi, ngo zibungure ibitekerezo byavamo amasomo yo kurengera ibidukikije, nk’uko Umuyobozi wa INILAK, Dr Ngamije Jean yasobanuye.

Simon Kamuzinzi