Ubuyobozi bw’uyu murenge bwabisabye abaturage mu rwego rwo kwitegura guhanga n’ibihe by’imvura nyinshi ikunze kugaragara mu kwezi kwa Mata, igwa muri aka gace ari nyinshi igatera isuri.

Butasi Jean Herman, Umunyamabanga nshingwabikorwa w’umurenge wa Murunda, agira ati: "Ubu gutera ibiti no gucukura imirwanyasuri niyo gahunda dushyize imbere, kuko aka karere ka Rutsiro ni akarere k’imisozi miremire kandi hakunze kugwa imvura nyinshi".

Akomeza avuga ko ariyo mpamvu bashaka kubikora hakiri kare kandi bakabirangiza igihe cy’imvura ikabije kitaraza.

Barateganya no gutera ibiti bikomeye ku nkengero z’imihanda, bacukura imiyoboro y’amazi mu rwego rwo gukumira itenguka ry’imihanda kubera imvura.

Abaturage nabo batangaza ko biteguye gushyira mu bikorwa iyo gahunda ariko bagasaba ko bakoroherezwa mu kubona imirama y’ibyo biti, ndetse n’ubuyobozi bukabegera mu rwego rwo kubigisha uburyo bwo kubitera.

Védaste Nkikabahizi