Imirimo yo gukora amaterasi ndinganire yakozwe n’inkeragutabara yakorewe mu murenge wa Bigogwe mu karere ka Nyabihu ahitwa Arusha. Igikorwa cyo gukora amaterasi ya hegitali 306 harimo na hegitari 100 zakozwe n’inkeragutabara ndetse n’abaturage cyatwaye amafaranga agera kuri miliyoni 900.

Uhagarariye inkeragutabara mu ntara y’iburengerazuba, General Major Ngendahimana Jerome, yishimiye cyane certificates inkeragutabara zahawe anavuga ko nta kibazo bazongera kugira gikomeye mu gukora amaterasi kuko babonye ababihugukiye kandi babikoze babizi.

Yashimiye kandi minisiteri y’ubuhinzi n’ubworozi mu Rwanda yatekereje gutanga certificate kuri zimwe mu nkeragutabara zakoze mu materasi bitewe n’ubumenyi yazibonyeho.

General Major Ngendahimana yongeyeho ko nk’inkeragutabara, batazaharanira gucunga umutekano w’igihugu gusa ahubwo ko bazanafasha icyatuma abaturage batera imbere n’igihugu kigatera imbere muri rusange. Inkeragutabara zitabira ibikorwa by’ubuhinzi nko gukora amaterasi y’indinganire, kurwanya isuri, gutera ibiti ku misozi n’ibindi.

Aya materasi yakozwe mu rwego rwo kurwanya isuri no gukora ubuhinzi bw’umwuga bwateza imbere abaturage.

Dr. Jean Jacques Mbonigaba Muhinda wari uhagarariye MINAGRI mu ikorwa ry’aya materasi yavuze ko abaturage kimwe n’inkeragutabara bungukiye ubumenyi mu bikorwa byo gukora amaterasi y’indinganire.

Safari Viateur