Umuhuzabikorwa w’urubyiruko muri uwo Murenge, Uwamwezi Delphine, avuga ko ingo z’abaturage kuri uwo musozi zifite ibyago byo kuzatembanwa n’isuri mu gihe batitabiriye kuhatera ibiti.

Uwamwezi agira ati "Tudateye ibiti mu myaka itanu iri imbere nta cyo waba ukihabona, nyamara tubiteye bivuze ko icyo gihe bizaba byagabanyije umuvuduko w’isuri isenya inzu z’abaturage."

Avuga ko uwo musozi wari ubateye impungenge kuko uhanamye kandi akaba ari ahantu hacukurwa amabuye na kariyeri byo kubakisha, imvura yagwa igatembana itaka rikajya kurengera imirima y’abaturage.

Mugenzi we Gaspard Niyonizera avuga ko Umuganda bakoze ari ukuva mu magambo bashyira mu bikorwa ibyo bahora bavuga ko ari imbaraga z’Igihugu zubaka.

Umuyobozi wungirije w’Umujyi wa Kigali ushinzwe Imiturire n’Ibikorwaremezo, Dr Merard Mpabwanamaguru, avuga ko hari kuboneka urahare runini rw’Urubyiruko mu kubungabunga ibidukikije no kubakira abatishoboye.

Dr Mpabwanamaguru avuga ko urubyiruko rushobora kungukira mu bikorwa byo kurengera ibidukikije ruramutse rukoze imishinga yo kubyaza umusaruro ibishanga.

Dr Mpabwanamaguru ati "Ibishanga ni bimwe mu byakoreshwa mu kubyazwa umusaruro aho dukangurira urubyiruko gukora imishinga y’ubuhinzi n’ubworozi, gukora imishinga migari y’ubukerarugendo, ndetse no kuba bategura pepinyeri z’amashyamba."

Avuga ko bashobora kwegera ubuyobozi bagahabwa ibice bimwe by’ibishanga biri muri uyu Mujyi kugira ngo babikoreshe.

Umuyobozi wungirije w’Umujyi wa Kigali avuga ko mu minsi iri imbere bagiye kwibanda ku biti bya gakondo, mu rwego rwo gusubiza uyu Mujyi umwimerere wahoranye.

Minisiteri y’Urubyiruko n’Umuco ivuga ko mu Rwanda habarirwa urubyiruko rurenga miliyoni eshatu rushobora kwifashishwa mu bikorwa biteza imbere Igihugu.