Ibi Minisitiri yabigaragaje nk’imwe mu mbogamizi ituma abaturage bagitema ibiti byo gutwikamo amakara, ndetse n’inkwi zo gucana kandi biri mu byangiza ibidukikije.

Depite Nzamwita Deogratias yabajije ingamba bafite, mu kugabanya inkwi n’amakara bicanwa mu rwego rwo kubungabunga ibidukikije, maze Minisitiri Uwamariya agaragaza ko hakiri urugendo kuko ikiguzi cya Gaz kikiri hejuru, ugereranyije n’ubushobozi bw’abaturage.

Ati “Ntabwo ari buri muturage wese wakwigondera Gaz yo gucana, kuko ubushobozi bwabo ari buto ugereranyije n’igiciro cyayo. Turimo turareba ko hashyirwaho uburyo gaz yagurwa nk’uko amakara agurwa, umuntu akajya ahabwa ihwanye n’ubushobozi afite”.

Minisitiri Uwamariya avuga ko ingamba zafashwe zidatanga umusaruro uko bikwiye, akavuga ko gucana inkwi bikigaragara mu bigo by’amashuri no mu magororero, kuko usanga aribo bagikoresha nyinshi.

Yasobanuye ko impamvu ibigo by’amashuri ndetse n’amagororero badakoresha Gaz, bituruka ku kuba badafite ibikoresho byifashishwa mu guteka kuri iyo Gaz, kuko bisaba guteka inshuro nyinshi kandi batekera abantu benshi.

Yatanze urugero rw’ishuri Minisiteri y’Ibidukikije yasuye, basanga bakoresha toni imwe ya Gaz ifite agaciro ka 1,400,000 y’Amafaranga y’u Rwanda, bakoresha ku gihembwe, ariko bakoresha inkwi bagatanga Miliyoni zisaga 3Frw ku gihembwe.

Ati “Tuvuge n’iyo bagura toni ebyiri zaba zihendutse ugereranyije no gukoresha inkwi. Ariko imbogamizi bari bafite ni ukubona ibikoresho byo gutekesha bijyanye no gukoresha Gaz”.

Minisitiri Uwamariya yagaragaje ko ugereranyije Gaze iri mu gihugu n’abakwiye kuyikoresha, usanga idahagije hakwiye kongerwa ingano yayo.

Ingo 50,000 zizageragerezwaho kugura Gaz ku bilo aho kugura icupa ryose

Minisitiri Uwamariya yatangaje ko mu gihugu hose hagiye gukorerwa igerageza ku ngo ibihumbi 50, ryo kureba niba abaturage bafashwa kugura Gaz ku biro, bijyanye n’amafaranga bafite, aho kugura icupa ryose nk’uko bisanzwe bikorwa.

Yavuze ko Guverinoma y’u Rwanda izafatanya n’abafatanyabikorwa bayo, bakareba ko umuturage yabona Gaz yo gutekesha hakurikijwe ubushobozi afite.

Ati “Ubu buryo nibukunda buzafasha abaturage bafite ubushobozi bucye kubona gaze yo gutekesha, bityo batandukane no gucana inkwi n’amakara, bakomeze kurengera ibidukikije”.