Uyu muganda watangiriye mu Gasentere ka Nyabutaka, Akagali ka Rusagara ho mu Murenge wa Gakenke, hatoragurwa amashashi n’uducupa twa plastique. Abapolisi n’abasirikare berekereye abaturage uburyo hubakwa amashyiga akoresha inkwi nke azwi nka “rondereza”.

Uretse ibikorwa bijyanye no kubungabunga ibidukikije, abaturage na Polisi bakoze umuhanda ungana na km 1.5 mu Mudugudu wa Gahondo ho mu Kagali ka Rusagara, ibikorwa byose by’umuganda byahawe agaciro ka miliyoni 1.5.

Supt. Rwangombwa Dieudonné uhagarariye Polisi mu Karere ka Gakenke yakanguriye abaturage kwicungira umutekano batanga amakuru ku nzego zitandukanye zibegereye, bakirinda ibiyobyabwenge kuko biza ku isonga mu bitera ihungabana ry’umutekano.

Umuyobozi wa Polisi yibukije abaturage ko ihohoterwa rishingiye ku gitsina ritareba gusa abagore kuko hari n’abagabo bahohoterwa, abasaba kurirwanya bivuye inyuma.

Ubwo yagarukaga ku bikorwa byakozwe muri iki cyumweru cyahariwe Polisi “Police week”, yavuze ko uyu munsi hari hateganyijwe kwigisha abaturage kurwanya inkongi z’umuriro ariko bitewe na gahunda z’akarere, bahisemo gukora umuganda, icyo gikorwa kizakorwa ejo.

Umuyobozi w’akarere ka Gakenke, Nzamwita Deogratias, witabiriye uwo muganda yasabye abaturage kubungabunga ibidukikije bakoresha rondereza kuko ibarinda gukoresha inkwi nyinshi aho kumva ko rondereza ari iy’ubuyobozi.

Mu mihigo y’umwaka utaha, umuhigo wa rondereza n’uturima tw’igikoni biri mu bintu bizitabwaho by’umwihariko nyuma y’uko bisa nk’aho byasubiye inyuma; nk’uko umuyobozi w’akarere yakomeje abishimangira.

Icyumweru cyahariwe Polisi mu Karere ka Gakenke cyatangiye tariki 11/06/2013, aho abaturage bigishijijwe kurwanya ihohoterwa rishingiye ku gitsina, ibiyobyabwenge no kugenda neza mu muhanda hirindwa impanuka. Biteganyijwe ko kizasozwa tariki 16/06/2013.

Nshimiyimana Leonard