Abaperezida b’inteko y’u Rwanda, Burundi, Tanzania, Kenya na Uganda bahisemo gushinga ihuriro hagati yabo mu rwego rwo kunganira izindi nzego zinyuranye zishinzwe guhuriza hamwe ibi bihugu mu muryango w’Afurika y’Uburasirazuba; nk’uko byasobanuwe na Perezida w’Inteko y’Abadepite, Mukantabana Rose, mu kiganiro n’abanyamakuru tariki 04/05/2012.

Iyi nama izibanda ku myanzuro y’inama yayibanjirije i Kampala mu Ugushyingo 2011 nko gukurikirana amasezerano aba yaragiye asinywa hagati y’ibihugu bigize umuryango wa EAC. Izanibanda no ku mategeko azajyenga guhuza imipaka, ishyirwaho ry’ifaranga rimwe n’isoko rimwe hamwe n’ikigo kizashingwa iyigwa ry’amategeko ya EAC. Ibi byose biza bibimburira umuryango wa EAC kuzaba igihugu kimwe.

Iyi nama ibaye mu gihe manda y’abadepite b’umuryango wa EAC irangira bityo hirya no hino muri EAC hakaba hari gutorwa cyangwa kwitegurwa amatora yabo. U Burundi na Tanzania bimaze gukora ayo matora, naho ibindi bihugu birimo kuyategura. Buri igihugu kigize EAC nk’uko ari bitanu, cyohereza abadepite icyenda mu Nteko Ishingamategeko ya EAC.

Iyi nama ije ikurikiye iy’abaperezida b’ibihugu yabereye muri Arusha Tanzania, kandi zose zisenyera umugozi umwe wo kubaka igihugu kimwe cya EAC; nk’uko Perezida wa Sena y’u Rwanda, Dr Ntawukuriryayo Jean Damscene, yabisobanuye.

Jovani Ntabgoba