Mukaliriza Monique yabitangaje kuri uyu wa gatanu tariki 10/02/2012, mu nama n’abanyamakuru yavugaga ku nyungu zo kuba mu muryango w’Afurika y’Iburasirazuba n’uburyo u Rwanda rubyungukiramo.

Avuga ku kibazo cy’uko hari imyanzuro ibihugu bigize EAC byemeranywaho ariko u Rwanda rukaba arirwo rwonyine ruyishyira mu bikorwa, Minisitiri Mukaruliza yavuze ko hagiye gushyirwaho ikigo kizaba gishinzwe gukurikirana no guhwitura ibindi bihugu ngo bishyire mu bikorwa ibyemeranyijweho.

Minisitiri Mukaruliza yasobanuye ko kubera inyungu buri gihugu gifite muri uriya muryango ndetse n’uruhare kigomba kugira, nta gihugu gikwiye kwireba gusa ahubwo ko ibihugu byose bikwiye kureba icyateza imbere akarere kose.

Abanyeshuri baturuka mu bihugu bigize EAC biga mu Rwanda bakwa amafaranga amwe nk’ay’Abanyarwanda, nyamara Abanyarwanda bajya mu bindi bihugu ugasanga barihishwa nk’abanyamahanga.

Bimaze kuba akamenyero ko nyuma ya buri nama y’Abaminisitiri hategurwa ikiganiro n’abanyamakuru, kiba gifite ingingo runaka igomba kuvugwaho.

Emmanuel N. Hitimana