Guhera tariki 26 kugeza 28 Ugushyingo, i Nairobi hateganyijwe imurika rigenewe abantu baturutse imihanda yose bakora mu bijyanye no guhindura umusaruro w’ubuhinzi n’ubworozi, ugakorwamo ibiribwa cyangwa ibinyobwa bitandunye.

Muri iryo murikagurisha ryiswe Food Processing & Packaging Exposyum hazaba harimo abakora ibicuruzwa nk’ikawa, icyayi, inyama, amafi, imbuto,imboga, ibikomoka ku matungo, ibinyobwa bidasindisha, abakora imigati, ubuki ndetse n’abandi bose babyifuza.

Muri iryo murika, abashyitsi bazerekwa uko ibihingwa/ibikomoka ku matungo bihindurwamo ibiribwa bitandukanye kugeza ku cyiciro cya nyuma cyo kubipfunyika (packaging).

Hazanabera ibiganiro bijyanye n’imikorere y’inganda z’ibiribwa, abantu bungurane ibitekerezo ku birebana n’amasoko, ndetse no gufasha abatuye Afurika y’i Burasirazuba guhuriza hamwe ibitekerezo byo gukora imishinga ibyara inyungu.

Food Processing & Packaging Exposyum ni ihuriro mpuzamahanga riha abantu baturutse imihanda yose uburyo bwo gusangira amakuru n’ibitekerezo bifite akamaro.

Imurika rizatangira kuwa 26 kugeza kuwa 28 Ugushyingo 2013, mu cyumba cy’inama mpuzamahanga cya Kenyatta International Conference Centre (KICC) rijye ritangira saa tatu z’igitondo kugeza saa kumi n’imwe z’umugoroba.

Gasana Marcellin