Abahamagawe muri izi nyigisho ni abakorera ibigo by’ubucuruzi, amabanki, ibigo by’imari iciriritse, ibigo by’ubwishingizi n’abo mu rugaga rw’abikorera ku giti cyabo, bakaba bari kumurikirwa imikorere ya EAC ndetse n’amahirwe menshi y’ahashorwa imari ikunguka, ahari akazi n’ahari abafatanyabikorwa bifuza abo bakorana mu bihugu bigize umuryango EAC.

Gakire Jean Julien uri guhugura abitabiriye aya mahugurwa yatangiye tariki 02/10/2013 yabwiye Kigali Today ko igikorwa barimo kiri muri gahunda yaguye yo kwigisha ibyiciro binyuranye by’abakorera mu Rwanda ngo bamenye amahirwe menshi bakungukira mu gukorera mu bihugu bya EAC, cyane cyane mu nzego z’ubucuruzi n’ishoramari.

Gakire yagize ati “Kuri ubu abaturage bo mu bihugu bya EAC bose bafite amaahirwe menshi bafunguriwe no kuba EAC imaze guhuza imikorere mu byiciro binyuranye. Hari benshi ariko bataramenya ayo mahirwe kandi bashobora kuyabyaza inyungu n’umusaruro wabateza imbere”.

Gahunda ya EACSOF (East African Civil Society Organizations’ Forum) ngo ni ukumirikira Abanyarwanda mu byiciro binyuranye ahari ayo mahirwe hose, bamara kubimenya bagafata icyemezo bihitiyemo cyo kuyabyaza umusaruro.

Bamwe mu bitabiriye aya mahugurwa babwiye Kigali Today ko mu masomo bahawe bishimiye kumenya uko urubuga rwo gukora n’ubuhahirane rwagutse ku batuye EAC bose, ndetse banareba ibyiciro binyuranye bashobora kwaguriramo ibikorwa byabo mu bindi bihugu bya EAC.

Bavuze ko nibasubira iwabo mu kazi bazaganira n’abo bakorana buri wese mu byo akora bakareba uko babyaza inyungu amahirwe aboneka ku benegihugu ba buri gihugu kigize EAC nk’uko babisobanuriwe n’ababahuguye bo muri EACSOF.

Amahugurwa nk’aya ngo azagera ku byiciro binyuranye mu gihugu cyose, EACSOF ikazajya ihugura abantu basaga 1000 muri buri karere; nk’uko byemejwe na Gakire.

Ahishakiye Jean d’Amour