Ku buryo butunguranye, kuri uyu wa 3 Kamena, abagize EALA bahuye mu buryo bw’Ikoranabuhanga, bahindura umwanzuro bari bafashe kuwa 28 Mata i Kampala muri Uganda, wo gusubika imirimo yari inategerejweho kwemerezwamo ingengo y’imari ivuguruye y’umuryango w’ibihugu by’u Burasirazuba.

Nyamara iri hagarikwa, umuyobozi wa EALA Joseph Ntakirutimana ukomoka mu gihugu cy’u Burundi yari yahakanye muri Gashyantare uyu mwaka ko ritazabaho.

Gusubukura imirimo byashobotse nyuma y’uko inama y’Abaminisitiri yo mu bihugu bigize uyu muryango yateranye kuwa 29 Gicurasi, ikaguza mu nzego zigize EAC Amadolari ya Amerika $660,690.

Icyatumye baguza aya mafaranga, ni ukugira ngo byibuze EALA ishobore gutora imishinga y’amategeko y’ingenzi agendanye n’iby’imari ndetse n’ingengo y’imari yatuma umuryango ukomeza kubaho.

Nyuma y’iri somo ryo kwizirika umukanda, Abagize EALA bashimiye inama y’Abaminisitiri b’umuryango bababoneye uburyo bwo kongera guterana bagakora akazi kabo, ariko bongera kuzamura ikibazo cy’ibihugu bidatanga imisanzu yagenwe, bigatuma imirimo ihagarara.

Bamwe ndetse basabye ko hubahirizwa ingingo y’146 ishyiraho EAC, iteganya ibihano ku bihugu bitubahirije amategeko arebana n’imisanzu.

Iyi ngingo ivuga ko igihugu kinyamuryango cya EAC kitubahiriza amahame, amategeko n’amabwiriza ya EAC harimo no gutanga imisanzu, kikaba kigezemo ibirarane by’amezi cumi n’umunani, gihagarikwa, ntikibe kikibona ku nyungu z’umuryango.

Icyo gihugu ngo n’ubwo cyaba kitabona izo nyungu, cyaba gitegetswe gukomeza gutanga ibisabwa umunyamuryango wese, kikongera kubona uburenganzira ku mahirwe ari mu muryango ari uko ibihano byagishyiriweho bikuweho.

Inteko y’uyu munsi yasubitswe, amatariki izasubukurirwa akaba azamenyeshwa abayigize mu minsi iri imbere.