Umuyobozi w’iyi nama, Brig. Charles Kang’ethe ukomoka mu gihugu cya Kenya, afungura iyi nama y’iminsi ibiri, yashimangiye ko kwigira hamwe no gutorezwa hamwe ari ishingiro ry’ubufatanye n’imikoranire hagati y’ingabo z’Umuryango w’Afurika y’Iburasizuba mu bikorwa byo guhashya umwanzi.

Na none kandi yavuze ko guhuriza hamwe inyigisho zitangwa muri ayo mashuri makuru ya gisirikare ari ingirakamaro mu ntumbero yo kurinda umutekano w’ibihugu byabo n’uw’akarere muri rusange.

Agira ati: “Intego nyamukuru y’iyi nama ni ugusangira amakuru ku nyigisho zitangwa mu bihugu bigize umuryango bityo tugasuzuma integanyanyigisho zigisha ibintu bimwe kugira ngo tugire uburyo bumwe bwo kugera ku ntego yo gusigasira umutekano wa EAC n’uw’akarere muri rusange”.

Iyi mikoranire igeze kure kuko nk’Ishuri Rikuru rya RDF ry’i Nyakinama ryakira abanyeshuri bava bihugu bigize Umuryango w’Afurika y’Iburasizuba hiyongereyeho Sudani y’Amajyepfo. Umwaka washize harangijemo abanyamahanga umunani.

Ngo kuba abasirikare bakuru bo muri EAC bicarana ku ntebe imwe y’ishuri bagasangira ubumenyi n’ubunararibonye ni ikimenyetso cy’uko ibihugu bya EAC bigana aheza mu by’umutekano; nk’uko Col. Sam Omala, intumwa y’Ingabo za Uganda muri EAC abishimangira.

Ati: “Yego, intego zirahari, bwa mbere hari ukubaka icyizere mu ngabo, baraganira, bitoreza hamwe, barasurana, mu minsi ishize turangije amarushanwa ya siporo n’iby’umuco muri Zanzibar mu Leta zunze za Tanzania ni icyerekezo cyiza tuganamo.”

Iyi nama ihuza amashuri makuru ya gisirikare iba kabiri mu mwaka, igamije by’umwihariko gusuzuma no guhuriza hamwe inyigisho z’amashuri makuru ya gisirikare yo muri uwo muryango kugira ngo batange ubumenyi bumwe. Yitabiriwe n’abayobozi b’amashuri makuru ya gisirikare ya Uganda, Tanzania, Burundi na Kenya n’intumwa z’ingabo mu muryango wa EAC ndetse n’ubunyamabanga bwawo.

Nshimiyimana Leonard