Komiseri Tusabe yavuze ko nta mucuruzi uziringira igihugu kimwe ngo areke ikindi mu bihugu bitanu bigize umuryango wa EAC, aribyo u Rwanda, u Burundi, Uganda, Tanzania na Kenya, kubera ko buri gihugu cyigira ku bindi uburyo bwo kwinjiza imisoro myinshi hatabayeho kubangamira abikorera.

Yagize ati “Abacuruzi bo mu Rwanda benshi usanga banacururiza mu bihugu duturanye; niba bambutse umupaka ntibatangire gutungurwa n’ibintu batari bamenyereye; niba ukorera mu Rwanda ukajya i Kampala ugomba kumenya ko imikorere izaba ari imwe.”

Mu nama yabaye mu ntango z’iki cyumweru yahuje abacuruzi bakuru bo mu Rwanda n’Ikigo cy’imisoro n’amahoro, bamwe muri abo bacuruzi bemeje ko bakorera mu Rwanda no hanze muri Uganda, ndetse ko hari n’ibihuha by’uko bashobora kureka gukorera mu Rwanda.

Umuyobozi wa Rwanda Revenue yavuze ko buri gihugu cya EAC kigiye gukurikiza imikorere y’ibindi yaba irushaho gutanga umusaruro, aho avuga ko u Rwanda ruziga uburyo Tanzania yateye imbere mu gukoresha imashini zitanga inyemezabuguzi n’uburyo Kenya ngo yungutse miliyoni zirenga 200 z’amashilingi y’icyo gihugu, kubera guhindura itegeko rigenga umusoro ku nyongeragaciro.

Icyakora, uretse u Burundi bukirimo kurenza intego bwiha mu kwakira imisoro kuko bugisoresha amafaranga make, nabyo bivuye kukuba ikigo cy’imisoro cyaho kitaratera imbere cyane, ibindi bihugu bya EAC byagaragaje ko intego yabyo itarimo kurenza iyo bagezeho mu myaka yashize.

Ibi ngo biraterwa ahanini n’ihungabana ry’ubukungu ku isi, ryateje abantu kubura amafaranga yo gutera za Leta inkunga, kubura ubushobozi bwo kugura no gushora imari mu bihugu cyangwa gukora ubukerarugendo; nk’uko byasobanuwe n’umuyobozi mukuru wa RRA.

Simon Kamuzinzi