BK Group Plc yavuze ko iyo nyungu yiyongereyeho 17.2% ugereranyije n’umwaka wari wabanje wa 2017.

Ibi byatangajwe kuri uyu wa 28 Werurwe 2019, ubwo BK Group Plc yatangazaga uko yakoze n’inyungu yabonye mu mwaka ushize, kugeza tariki ya 31 Ukuboza 2018.

Dr. Diane Karusisi, Umuyobozi wa BK Group Plc, yatangaje ko mu minsi mike BK iba iri mu bigo bifite umutungo ubarirwa muri miliyari imwe y’Amadorari ya Amerika

Umuyobozi wa BK Group Plc, Dr. Diane Karusisi, yavuze ko kuba ubukungu bw’igihugu muri rusange bwariyongereyeho 8.6%, ari imwe mu mpamvu zatumye ibikorwa bikorerwa mu gihugu bitera imbere, ari na ho Banki ya Kigali yahereye yongera inyungu yari isanzwe ibona.

Yavuze kandi ko abafatanyabikorwa n’abakiriya babo na bo bagize uruhare rugaragara muri uko kubona inyungu babashije kugeraho.

Yagize ati “Turashimira abakiriya bacu, turanashimira cyane cyane n’abafatanyabikorwa bacu. Muzi ko umwaka ushize twagiye kubareba tubabwira ko twifuza ko ibikorwa byacu byaguka, abenshi barabyitabiriye cyane baduha andi mafaranga yo gushyira mu mari shingiro ya banki, ku buryo uyu munsi banki ifite amafaranga menshi ahagije yo gutanga mu nguzanyo, no gukora ishoramari ry’ikoranabuhanga”.

Dr. Diane Karusisi kandi avuga ko mu mwaka wa 2018, Banki ya Kigali yabashije gutanga inguzanyo nyinshi, zazamutseho 20% ugereranyije n’umwaka wari wabanje, iyi na yo ikaba imwe mu mpamvu zazamuye inyungu yabonetse muri 2018.

Ati “Iyo urebye inguzanyo zatanzwe umwaka ushize ziyongereyeho 20% ugereranyije n’umwaka wari wabanje wa 2017. Ni ukuvuga ko amafaranga twatanze mu nguzanyo yabaye menshi. Ubucuruzi bwacu ni uko bugenda, iyo dutanze amafaranga natwe turunguka”.

BK Group Plc kandi, uretse gucuruza amafaranga yanashyize imbaraga mu bindi bikorwa birimo nko gutanga ubwishingizi, na byo bikaba biri mu byatumye haboneka inyungu iri hejuru.

Muri gahunda BK Group Plc ifite mu rwego rwo gukomeza kuzamura umutungo wayo muri uyu mwaka wa 2019, harimo ko ubu inguzanyo yatangwaga ku muntu ku giti cye adasabwe ingwate yazamuwe ivanwa kuri miliyoni 10 igezwa kuri miliyoni 30.

BK Group Plc ibumbiye hamwe ibigo birimo Banki ya Kigali, BK TecHouse, BK General Insurance na BK Capital.

Umutungo mbumbe w’iki kigo na wo mu mwaka ushize wazamutseho 20.7% ugera kuri miliyari 877Frw, BK Group ifite gahunda y’uko mu mpera z’igihembwe cya mbere cya 2019 izaba iri mu bigo bifite umutungo ubarirwa muri miliyari imwe y’Amadorari ya Amerika.

MENYA UMWANDITSI

Charles Ruzindana

Umunyamakuru

@ CharlesRUZINDA2

Reba inkuru zose nanditse ( 674 )

Kureba andi mafoto menshi KANDA kuri kano gafoto