Imparage ni inyamaswa igira ibara ry’umukara n’umweru ariko ngo imirongo y’ayo mabara iba itandukanye, nta yihuza n’indi imiterere y’imirongo yayo.

Ikindi ngo ni uko ibara ryayo ari ryo uzizi aheraho atandukanya igitsina cyazo kuko kiba gihishe cyane kidapfa kugaragara.

Ati “Nk’uko bavuga ko abantu badashobora guhuza igikumwe, ni na ko imparage zidahuza imiterere y’imirongo yazo ku buryo uzizi ashobora kuzitandukanya. Kumenya igitsina cyazo biragorana bisaba kwitonda, ariko hari umurongo w’umukara utariho ubwoya uva ku nda y’amaganga ukamanuka hagati y’amaguru, iyo ari ingore uba ari mugari naho ingabo ukaba mutoya.”

Ubusanzwe ngo imparage zikunze kubaho mu itsinda rinini rigizwe n’indi miryango mito mito aho umwe ushobora kuba ugizwe n’imparage hagati ya eshanu na zirindwi kandi ukabamo umuyobozi wawo. Ngo kuba hamwe kw’imparage ahanini gushingiye ku gushaka umutekano.

Imparage ihaka amezi 12 kandi ikabyara icyana kimwe uretse ko ngo binashoboka ko yabyara ibyana bibiri icyarimwe, ndetse ikaba yanabyara imbyaro nyinshi kuko ifite igihe cyo kubaho kiri hagati y’imyaka 25 na 30.

Icyana cy’imparage cyonka hagati y’amezi 8 na 11, ikigabo kikaba gitangira gushaka umuryango wacyo ku myaka itandatu.

Icyana cy’imparage kivuka gifite ibara ry’umutuku n’ikigina, uko igenda ikura ikigina kigahinduka umweru naho umutuku ugahinduka umukara, byagera ku mezi atandatu amabara akaba yamaze kuba umukara n’umweru.

Amabara y’imparage ayifasha kumenyera ikirere no kwirinda umwanzi

Ngo ibara ry’umukara rikurura ubushyuhe mu gihe iry’umweru riburwanya bigatuma kugira umweru n’umukara bizifasha kugira ubushyuhe butazibangamiye.

Amabara y’imparage ngo azifasha cyane ariko mu kwirinda umwanzi wazo (inyamanswa z’indyanyama).

Agira ati “Ariya mabara azifasha kwirinda umwanzi, nk’Intare burya iyo igiye gufata inyamanswa, itumbera imwe ntikurikira zose ahubwo ikurikirana imwe mpaka iyifashe. Ariya mabara rero hari uburyo ayijijisha ntimenye iyo yari ikurikiye.”

Nk’izindi nyamanswa ngo biragoye ko imparage yakwima itarinze, uretse udusumbashyamba n’ibitera bishobora kubikora byishimisha.

Imparage ntijya mu mihango nk’uko abantu benshi bibeshya, ahubwo ngo ishobora kugarura amaraso mu gihe yimye ariko ntifate.

Imparage ziruhuka mu ijoro kuko aribwo ziba zizeye umutekano ariko ngo na ku manywa zishobora kuryama imwe ikagereka umusaya ku yindi zireba mu byerekezo bitandukanye kugira ngo buri yose icunge aho umwanzi yaturuka.

Tuyisenge avuga ko imparage zikunze kubana n’izindi nyamanswa zirisha nk’impala, inyemera ndetse n’imbogo hagamijwe gufatanya gushaka umutekano wazo. Ikindi ngo zikunda kuba ahantu hirengeye zishobora kureba ahantu umwanzi yaturuka.

Ikindi ni uko imparage zikunda kwibera ahantu hashyuha, ariko na none haboneka amazi yo kunywa. Imparage ntiyuza bikayifasha kuba yarya ibintu byinshi kandi binakomeye.