Ibimenyetso bikubwira ko wabaye imbata y’inzoga, ni uko iyo utayibonye ngo uyinywe bigutera kumva ubuze amahoro ndetse rimwe na rimwe ukabura ibitotsi.

Prof. Sezibera Vincent, waminuje mu bijyanye n’imyitwarire ya muntu (Psychologist), akaba n’umwarimu muri Kaminuza y’u Rwanda, avuga ko inzoga ari kimwe mu bigira imbata abantu ku buryo uwo byabayeho umubwirwa n’uko iyo atanyoye inzoga, usanga yabuze amahoro, akumva hari icyo abura mu buzima bwe.

Uko wafasha uwabaye imbata y’inzoga kuyireka cyangwa se kunywa mu rugero rukwiye, ni ukubanza kumenya icyamuteye kunywa izo nzoga.

Prof. Sezibera avuga ko ibyatera umuntu kunywa inzoga ari byinshi cyane, harimo kuba umuntu afite ibibazo akibwira ko kunywa inzoga bimufasha kubyiyibagiza, kuba umuntu afite inshuti zikunda kunywa inzoga, kuba abura ibitotsi ku mpamvu runaka ariko yanywa inzoga akumva ziri bumufashe gusinzira.

Ati “Kuba imbata y’inzoga ni uko buri munsi uyinywa ndetse waba utayinyoye ukumva nta mahoro ufite, gukora bikakunanira, gutekereza bikanga, ukumva usa nk’aho udatekanye”.

Gufasha uwo muntu wabaswe n’inzoga ngo ni urugendo rudakorwa umunsi umwe ngo rurangire, bisaba ko mubanza mukaganira ukamenya icyamuteye kunywa inzoga nyinshi, iyo ukimenye utangira kumufasha buhoro buhoro no kumwereka inzira yo kubisohokamo.

Prof. Sezibera avuga ko iyo umunywi w’inzoga abiterwa n’inshuti mbi, umusaba kuzireka cyangwa agahagarika kugendana na zo. Iyo ari ikindi kibazo afite umufasha gushaka inzira yo kugikemuramo ariko atiyahuje inzoga. Ikindi gifasha uyu muntu ni ukumutega amatwi akavuga ibibazo afite kuko iyo abivuga bimufasha gukira no gusubira mu murongo mwiza w’ubuzima.

Hari urwego umuntu ageraho ugasanga inzoga zamuteye uburwayi twakwita ko bufitanye isano n’imikorere y’ubwonko (Les troubles psychiques), aha rero bisaba ko umuntu atangira guhabwa imiti yo kwa muganga imufasha gusubiza ubwonko ku murongo.

Prof. Sezibera atanga inama ko abantu bakwirinda kuba imbata y’ikintu runaka, kuko iyo bikabije bikamara igihe kirekire bihinduka uburwayi bwo mu mutwe.

Urubuga www.doctissimo.fr ruvuga ku ngaruka zo kuba imbata y’inzoga, rwerekana ko zigira ingaruka ku bwonko ku rugero rumwe n’urumogi, ndetse n’ibindi biyobyabwenge byose.

Iyo ubwonko bumaze kurengwa n’inzoga ku kigero runaka, bizana izindi ngaruka zirimo gukora nabi, kugenda buhoro, amaso agatangira kubona nabi no kwibagirwa.

Ikindi ni uko umuntu atangira gutakaza ubushobozi bwo guhuza ibikorwa by’umubiri we no kubigenzura, kudandabirana, uburyo bwo kubona ibintu no gufata ibyemezo na byo bikagenda bigabanuka.

Iyo umusinzi ageze kuri iki cyiciro cyo guhondobera, igipimo cy’inzoga kiba kirenze garama 2 muri litiro imwe y’amaraso.

Ikindi kiranga uwo muntu ni ugusinzira cyane (cyangwa kujya muri koma), mu gifaransa ni byo bita ‘coma ethylique’.

Kuri iki cyiciro umusinzi aba afite igipimo cy’inzoga kirenze garama 3 muri litiro imwe y’amaraso. Kirangwa n’umuvuduko w’amaraso uri hasi, guhumeka nabi ndetse n’igipimo cy’ubushyuhe na byo biba biri hasi cyane. Uyu muntu iyo adakurikiranywe n’abaganga aba ashobora no gupfa.

Usibye izi ngaruka zigaragara ku buzima bw’uwanyoye inzoga, hari n’izindi zigaragara mu myitwarire ye:

Ubusinzi buhuzwa n’impfu zituruka ku mpanuka zo mu muhanda ku kigero cya 40 %, hagati ya 25-35 % ku mpanuka z’imodoka ariko zidatwara ubuzima bw’abantu, 64 % mu guteza inkongi z’umuriro na 50% mu bwicanyi.

Inzoga ziba intandaro y’ibyaha ku kigero cya 50 na 60%. Rimwe na rimwe umuntu wanyoye inzoga afata imyanzuro ahubutse, atabanje gutekereza ku ngaruka, zamara kumugeraho akisanga mu ntege nke hamwe atabasha kwisobanura no kwirwanaho.

Umuntu wabaswe n’inzoga bimwongerera ibyago byinshi byo gukora imibonano mpuzabitsina itumvikanyweho ndetse idakingiye, ari na byo byamugusha mu kwandura indwara zandurira muri yo.

Mu ngaruka z’igihe kirekire hazamo indwara zitandukanye nka kanseri yo mu kanwa, mu muhogo, indwara z’umwijima (cirrhose) n’urwagashya, umutima, izifata urwungano rw’imyakura ndetse n’izijyanye n’imitekerereze n’ubuzima bwo mu mutwe nka depression (kwiheba cyangwa agahinda gasaze), n’izindi.

Inkuru ya doctissimo iravuga ko umuntu unywa inzoga ubwoko ubwo ari bwo bwose, guhera ku kirahure kimwe ku munsi yaba Divayi, byeri cyangwa inzoga zikomeye, aba afite ibyago byinshi byo kurwara kanseri. Impamvu ikaba ari uko ikinyabutabire kiba muri ibyo binyobwa byose bisindisha cyitwa ethanol kiba intandaro yo kurwara kanseri.

Hari abantu batemerewe kunywa inzoga habe na gake, abo ni ababyeyi batwite n’abonsa, abana, ingimbi n’abangavu n’umuntu uri ku miti imwe n’imwe.