Imvugo yo ‘Guta igiti’ ntabwo ari imvugo imenyerewe cyane cyane mu rubyiruko, kuko hari abibaza icyo uwo muhanzi yashatse kuvuga muri iyo ndirimbo.

Mu rwego rwo gusobanurira abantu iyo mvugo, Kigali Today yaganiriye n’umusaza witwa Muganwa Jean Damascène.

Umusaza Muganwa yavuze ko ‘Guta igiti’ ari imvugo yakundaga gukoreshwa cyane cyane hambere, isobanura ‘Kwera’ ni ukuvuga kwerera uwapfuye, bibanzirizwa no ‘Kwirabura’, kwiraburira uwapfuye.

Iyo umuntu yapfuye, abagize umuryango we ngo baramwiraburiraga, ubu imvugo y’iki gihe ngo ni byo bata ‘ikiriyo’, ugasanga abantu bavuga ngo tugiye mu kiriyo cya kanaka cyangwa se ngo tugiye kuva ku kiriyo kwa kanaka.

Yagize ati “Guta igiti ni Ukugandukira uwapfuye, ni uko Kuganduka ari ijambo rituruka mu Kirundi, ariko mu Kinyarwanda ni Ukuva ku rupfu, kwerera uwapfuye, abapfushije umuntu bakavuga bati, ubu tugiye kuva mu gahinda, tugiye kukibagirwa dukomeze ubuzima”.

Hari kandi n’ubwo ngo umuntu akoresha iyo mvugo ashaka kuvuga ko uwo muntu wapfuye atasize ubusa, agifite abantu bamukomokaho, bityo ko n’ubwo yagiye atibagiranye cyangwa se atazibagirana.