Asobanura ko hari impamu zitandukanye zishobora gutuma umuntu atangira kujya abura ibitotsi uko bisanzwe, harimo nko kuba umuntu atangiye kugera mu myaka y’izabukuru, gukenera kujya mu bwiherero buri kanya mu masaha y’ijoro, gukora akazi ko kurara izamu nijoro, kugera mu gihe cyo guca imbyaro n’ibindi.

Dr Faith Orchard, agira inama abakunze kubura ibitotsi bitewe no kuba bafite ibitekerezo byinshi bibabuza gutuza, yo kujya mu bindi bafata nko gukemura ibyo bibazo, bashaka uko basoma ibitabo, bakabona ituze, bityo n’igihe cyo kuryama bakabona ibitotsi.

Atanga urugero kuri we, yagize ati "Njyewe iyo ndyamye nkananirwa gusinzira, ubusanzwe ubwo biba byatewe n’ubwonko bwanjye bwananiwe ndimo ntekereza cyane. Ubwo rero mpita mfata igitabo ngasoma kugira ngo ntuzemo gacyeya”.

Dr Ellie Hare, inzobere mu by’imiti ifasha abafite ibibazo byo kubura ibitotsi, mu bitaro bya Royal Brompton i Londres, we agira inama abantu babura ibitotsi bitewe no kuba bararana n’abantu babarogoya mu gihe basinziriye, gushaka uko bajya kuryama ahandi hatuje, kuko byafasha kongera kujya basinzira neza bakaruhuka.

Yagize ati “Iyo ndwamye nkananirwa gusinzira, akenshi biba byatewe n’uko umugabo wanjye arimo yihindagura ku buriri buri kanya cyangwa se arimo agona cyane. Ubwo rero icyo gihe mpita njya mu kindi cyumba kugira ngo nsinzire neza ntuje”.

Prof. Colin Espy, inzobere mu by’imiti ifasha abafite ikibazo cyo kubura ibitotsi wo muri Kaminuza ya Oxford, asobunura ko abantu bagira ikibazo cyo kubura ibutotsi bitangiye gahoro gahoro, bigatangira ari umunsi, umwe wagenze nabi nyuma bigafata ibyumweru, nyuma bigafata amezi.

Yagize ati "Ubundi, bitangira ari ijoro rimwe ryagenze nabi, nyuma bigafata iminsi runaka, ibyumweru, amezi atatu cyangwa se no hejuru, ibyo ni byo twita kubura ibitotsi ku buryo bw’igihe kirekire”.

Yakomeje agira ati "Njyewe iyo ndyamye bikanga ko nsinzira, ubusanzwe mva mu gitanda, hashira akanya nkakigarukamo, kugira ngo ntangire bushyashya gahunda yo kuryama. Kuko akenshi ikiba kimbuza gusinzira, ni uko ubwenge bwanjye buba buhigiye ku kintu runaka, ngitekerezaho cyane, kandi ibyo ngira ngo ni ukibazo gihuriweho n’abantu benshi”.

Dr Ellie Hare, avuga ko ibimenyetso biranga abafite ikibazo cyo kubura ibitotsi, ari ibisanzwe, kandi ko hafi abantu 50% by’abatuye Isi, bagira ibyo bimenyetso.

Yagize ati “Niba ugira ikibazo cyo kubura ibitotsi mu minsi irenga itatu mu cyumeru, ibyo bikamara amezi arenga atatu, biba birimo kwangiza ubuzima bwawe buri munsi, ubona igihe kiba kigeze cyo kujya kureba umuganga”.

Dr Orchard, avuga ko ubundi kugira ngo abantu babone ibitotsi neza, ndetse bakanguke neza baruhutse, hari ibintu bibiri bisabwa, “imisemburo (hormones) itera ibitotsi, kongera umunaniro ugenda wiyegeranya amasaha yose ya ku manywa. Kugira ngo umuntu asinzire neza rero biba bisaba ko ibyo byombi bikora kandi bigakorana neza. Iyo imikoranire yabyo itagenze neza, bituma gusinzira bigorana. Gusa hari n’ibindi bituruka hanze y’ibyo bibiri, bishobora gutuma umuntu adasinzira neza, nko kuba akunze kugira ibitekerezo byinshi n’agahinda gakabije”.

Dr Eli Hair we avuga ko hari n’abantu babura ibitotsi kubera ko barwaye indwara zidakira, bakaba bafite ububabare budashira, ibyo bikabaviramo n’ibindi bibazo by’ubuzima bitandukanye, harimo nko guhorana umujagararo w’ubwonko (stress) n’ibindi.

Ikinyamakuru BBC cyatangaje ko Prof. Espy kimwe mu byo abona nk’igisubizo ku bantu bakunze guhura n’ikibazo cyo kubura ibitotsi, ari ukwirinda gushyira mu bwonko ko niba umuntu agiye kuryama hagiye gukurikiraho kunanirwa gusinzira, kuko ngo icyo na cyo kimwe mu byongera icyo kibazo, uko kubitekerezaho cyane.

Yagize ati “Ni ngombwa ko umuntu ashyiraho gahunda y’igihe aryamira kidahinduka, kugira ngo ubwonko bwe buyimenyere, no kugira ahantu ho kuryama hatuje. Mu gihe akangutse akumva ko bitaza gukunda ko yongera gusinzira, asohoke mu buriri arebe ibyo akora nko mu masaha abiri, yatangaye kunanirwa yongere aryame”.

Igihe cyo guca imbyaro (menopause), ngo kigora cyane abagore benshi kuko bahura n’icyo kibazo cyo kubura ibitotsi, ndetse no kuryama ubwabyo kuko ari igihe kijyana n’impinduka z’imisembura itandukanye, nk’uko byasobanuwe na Dr Orchard. Ahamya ko guhunduka kw’imisemburo kugira uruhare rukomeye mu kibazo cyo kubura ibitotsi ku bagore bamwe na bamwe bageze muri icyo cyiciro.

Dr Orchard yavuze ko n’inzoga ishobora kugira uruhare mu gutuma umuntu agira icyo kibazo cyo kubura ibitotsi, ariko inzoga yo ngo yangiza n’ibindi byinshi, kubera ko yo ituma abenshi mu bayinywa bagona cyane bagasinzira nabi, ubundi igatuma hari n’imisemburo yabo itera ibitotsi ihindagurika cyane.

Ikindi avuga ko umuntu akwiye kwirinda gukoresha cyane cyane mu masaha yo kuryama, ni urumuri ruturuka ku bikoresho by’ikoranabuhanga bitandukanye, harimo za telefoni, televiziyo, mudasobwa n’ibindi, kuko ngo bihungabanya cyane iyo misemburo itera gusinzira.