Ku rubuga https://bridoz.com/, bavuga ko konkombure ifasha umubiri w’umuntu kubona amazi ukenera ndetse no kuwuzanira za ‘vitamine’ zitandukanye.

Konkombure igizwe n’amazi ku rugero rwa 95 %, ibyo bigatuma ifasha umubiri kubona urugero rw’amazi ukeneye no kuwufasha gusohora imyanda. Ibyiza kandi ngo ni ukuryana konkombure n’igishishwa cyayo kuko mu gishishwa ni ho haboneka vitamine C.

Izo mboga zituma uruhu rugira ubuzima bwiza rukamererwa neza ndetse zigatuma n’imisatsi imera ari myinshi kubera ubutare bwa ‘soufre’ zigiramo.

Zinafasha mu kurwanya no gukumira Kanseri zimwe na zimwe kuko zigiramo ibyitwa ‘laricirésinol’, ‘pinorésinol’ ndetse na ‘secoisolaricirésinol’, kandi ibyo uko ari bitatu, hashize imyaka byifashishwa mu bushakashatsi ku bintu, byagabanya ibyago byo kurwara kanseri zitandukanye harimo kanseri y’ibere, ifata ku ntanga z’abagore, ifata nyababyeyi ndetse na kanseri ya ‘prostate’.

Konkombure kandi ngo ifasha abantu bakunda kugira impumuro mbi mu kanwa, icyo umuntu akora ngo akata agace gato ka konkombure ikase nk’uruziga, akayishyira mu kanwa ayiganisha mu nkaka akoresheje ururimi, ikamara nibura iminota 30 akayicira. Icyo gihe ngo iba igabanyije za ‘bacteries’ ziba mu kanwa zikurura impumuro rimwe na rimwe inabangamye.

Konkombure kandi ni nziza cyane ku bantu bifuza kugabanya ibiro kandi inafasha mu migendekere myiza y’igogora, kuko zikize cyane ku mazi ndetse na ‘fibres’ bituma zigira uruhare mu gusohora imyanda iba iri mu nzira y’igogora, ibyo bigatuma igogorwa rikorwa neza. Kuyirya buri munsi kandi ngo ni umuti w’umwimerere uvura ku bantu bagira ikibazo cyo kwituma impatwe ku buryo buhoraho (constipation chronique).

Konkombure zivura Diyabete, zikagabanya ibinure bibi bya ‘cholestérol’ ndetse zikagabanya umuvuduko w’amaraso ukabije. Umutobe wa konkombure wigiramo ubushobozi bwo gufasha mu kugenzura isukari mu maraso, ni yo mpamvu ari nziza ku bantu barwara diyabete.

Ubushakashatsi bwagaragaje ko konkombure zigiramo ikitwa ‘stérol’ kigira akamaro mu kugabanya ‘cholestérol’ , Konkombure zinigiramo ubutare bwa ‘potassium’, ‘magnésium’ ndetse na ‘fibres,’ ibyo byose bikaba bigira uruhare rukomeye mu kuringaniza umuvuduko w’amaraso, bityo zikaba nziza cyane yaba ku bantu bagira ikibazo cy’umuvuduko w’amaraso uri hejuru cyangwa se abagira ikibazo cy’umuvuduko w’amaraso uri hasi cyane.

Izo mboga kandi zigira uruhare mu buzima bwiza bw’ingingo, no mu kugabanya ububabare ku bantu barwara indwara ya ‘goutte’ ikunze gufata mu ngingo z’amaguru kandi ngo ikababaza cyane.

Konkombure ikize cyane kuri za vitamine A, B1, B6, C, D, folate, calcium, magnésium na potassium, iyo zivanzwe na karoti bifasha mu kugabanya ubwo bubabare buterwa na ‘goutte’.

Ku rubuga https://www.healthline.com, bavuga ko konkombure izanira umuntu za ‘antioxidants’, zifasha mu kwirinda indwara ya ‘Alzheimer’ ijyana no kwangirika k’ubwoko bigatuma umuntu yibagirwa cyane, agatangira kugira ikibazo cyo kutabona neza. Ikindi izo ‘antioxidants’ ngo zifasha umutima kugira ubuzima bwiza ndetse zigakumira kanseri zimwe na zimwe.

Kuri urwo rubuga kandi bavuga ko izo mboga zifasha mu gutuma amagufa y’umuntu akomera akagira ubuzima bwiza kuko zikize cyane kuri Vitamie K, ndetse zigakumira n’ikibazo cyo kwipfundika kw’amaraso mu mitsi.

Kugira ngo umuntu abone ibyiza bituruka kuri konkombure, ashobora kuyifata akayikata nk’utuzeru, agashyira mu mazi, nyuma y’iminota 30 akanywa ayo mazi, cyangwa se akarya izo konkombure azihekenya ari mbisi nka ‘salades’.

MENYA UMWANDITSI

Mediatrice Uwingabire

Umunyamakuru

@ umureremedia

Reba inkuru zose nanditse ( 1915 )