Komanda wa Polisi aho mu Ntara ya Shinyanga, Janeth Magomi yabwiye ikinyamakuru Mwananchi dukesha iyi nkuru ko, mu iperereza ry’ibanze rimaze gukorwa uhereye ku wa mbere tariki 2 Ukuboza 2024 ubwo uwo mugabo yasangwaga mu nzu yapfuye amanitse mu mugozi, ryagaragaje ko ikibazo cyatangiriye ku makimbirane hagati y’uwo mugabo n’umugore we kubera amasambu.

Komanda Magomi yasobanuye ko intambara hagati y’uwo mugabo (nyakwigendera) n’umugore we, zatangiye ubwo umugore yamubazaga igituma akomeza kugurisha amasambu yabo kandi ntanabanze kumumenyesha, kuva ubwo ngo yabifasha nabi, bimutera umujinya mwishi atangira gushaka gukubita umugore we, amuhungira mu baturanyi.

Yagize ati, “Ni byo koko byabaye, uwo mugabo yasanzwe yiyahuye, impamvu yabaye intandaro ikibazo cy’uko umugabo (nyakwigendera) yagurishaga amasambu atamenyesheje umugore, amakimbirane atangirira aho”.

Yakomeje asobanura ko bitangira, umugabo yashatse gukubita umugore, ahungira mu baturanyi abasaba ko bamufasha bakaza bakajya gukiza n’umwana we yari asize mu nzu ubwo yirukaga ahunga, ariko abaturanyi baje batabaye basanga uwo mwana yamaza gukomeretswa na Se mu ijosi bikomeye, bigaragara ko yatemeshejwe icyuma gifite ubugi butyaye.

Aba baturanyi bahageze ngo basanze uwo mwana wakomerekejwe ari ku ruhande, mu gihe Se yari amanitse mu mugozi yamaze gupfa. Ubwo nyina w’umwana yahise amwihutana kwa muganga, abaturanyi bamenyesha Polisi iby’uwo mugabo wiyahuye, Polisi iza gutwara umurambo mu Buruhukiro bw’ibitaro bikuru bya Shinyanga.