RDC: Uwaciye Ebola yahawe n’inshingano zo kurandura Coronavirus

Dr Jean-Jacques Muyembe Tanfum wari washinzwe kurwanya icyorezo cya Ebola muri Repubulika iharanira Demokarasi ya Congo (RDC) ni we wahawe gukumira icyorezo cya COVID-19 cyugarije iki gihugu.

Dr Jean-Jacques Muyembe
Dr Jean-Jacques Muyembe

Dr Jean-Jacques Muyembe ufatwa nk’intwari muri RDC yashoboye guhangana n’icyorezo cya Ebola kugeza hatanzwe urukingo ruri guhabwa abaturage mu burasirazuba bwa Congo.

Kugera tariki ya 18 Werurwe 2020 ubwo Dr Muyembe yashingwaga kurwanya icyorezo cya COVID-19 hari hamaze kubarurwa 3444 bagezweho n’icyorezo cya Ebola, abantu 2264 kirabahitana, abandi 1169 baragikize, hakaba hari n’abandi 372 ubuzima bwabo bukirimo gukurikiranwa.

Perezida wa Repubulika Iharanira Demokarasi ya Congo, Félix-Antoine Tshisekedi Tshilombo, yashinze itsinda riyobowe na Dr Jean-Jacques Muyembe Ntamfum rishinzwe gukumira icyorezo cya COVID-19 kubera ko bashoboye guhagarika Ebola yari yugarije igihugu itangiriye mu Burasirazuba.

Kuva tariki 8 Kanama 2018 kugera tariki 17 Werurwe 2020 abantu ibihumbi 301 785 bamaze gukingirwa urukingo RVSV-ZEBOV, naho abandi 20 339 bakingiwe urukingo Ad26.ZEBOV/MVA-BN-Filo “Johnson&Johnson” kugera tariki 29 Gashyantare 2020.

Repubulika iharanira Demokarasi ya Congo ihangayikishijwe n’icyorezo cya COVID 19 kimaze kugera ku bantu 18 harimo abagize Guverinoma, ndetse tariki ya 19 Werurwe abagize Guverinoma basabwe kujya kwipimisha nyuma y’uko Minisitiri w’ubukungu Acacia Bandubola yagaragayeho iki cyorezo.

Ishami ry’umuryango wabibumbye ryita ku buzima OMS ritangaza ko abantu ibihumbi 209 839 bamaze kwandura iki cyorezo, naho abantu ibihumbi 8778 bamaze guhitanwa na cyo, mu gihe kimaze kugera mu bihugu 169.

MENYA UMWANDITSI

kigalitoday android app mobile

Ibitekerezo  

Ohereza igitekerezo

Igitekerezo cyanyu kiragaragara kuri Kigali Today nyuma y'isuzuma kandi mu gihe kidatinze. Udashaka ko izina ryanyu rimenyekana wakoresha alias, Turabashimiye.

Amakuru aheruka