Perezida wa Tanzania, Dr John Pombe Magufuli, wakunze kudaha uburemere icyorezo cya COVID-19, ubu noneho ngo yemeye ko ari ikibazo gikomereye Tanzania

Ku Cyumweru tariki 21 Gashyantare 2021 nibwo yemeje ko ikibazo cya Covid-19 gihari muri icyo gihugu, ndetse asaba abaturage kubahiriza ingamba zo kukirinda, harimo no kwambara udupfukamunwa, ariko ngo bagomba kwambara udupfukamunwa twakorewe muri Tanzania gusa.

Impamvu asaba ko abaturage bakwambara udupfukamunwa twakorewe muri Tanzania gusa, ngo ni uko kuva icyorezo cya Covid-19 cyakwaduka, Perezida Magufuli ntiyahwemye kugaragaza impungenge ku bintu bituruka mu mahanga, ndetse n’inkingo za Covid-19, yavuze ko zidakwiye kugirirwa icyizere.

Iryo jambo rya Perezida Magufuli rije nyuma y’iminsi mike, icyo gihugu gifite abaturage basaga miliyoni mirongo itandatu gipfushije bamwe mu Banyapolitiki bakomeye, bikanavugwa ko harimo abishwe na Covid-19. Muri abo Banyapolitiki Tanzania yapfushije muri iyi minsi harimo, Visi-Perezida w’Ikirwa cya Zanzibar, wapfuye nyuma y’uko ishyaka rye ritangaje ko yafashwe na Covid-19.

Undi ni Umunyamabanga mukuru wa Perezida Magufuli (President’s Chief Secretary) n’ubwo impamvu y’urupfu rwe itagaragajwe. Ariko ubwo Perezida Magufuli yagezaga ijambo ku bitabiriye umuhango wo gushyingura uwo Munyamabanga we, ngo yasabye Abaturage gusenga amasengesho y’iminsi itatu, kuko hari indwara itaramenyekana neza, ifata mu myanya y’ubuhumekero, iyo ndwara ubu ngo ikaba ari ikibazo gikomeye muri Tanzania.

Tanzania iheruka gutangaza imibare ijyanye na Covid-19 muri Mata 2020, kuko Perezida Magufuli yavugaga ko Covid-19 yarangiye mu gihugu cye. Umubare uzwi w’abanduye Covid-19 muri Tanzania wahagarariye kuri 509 gusa, ariko abaturage bavuga ko abantu benshi cyane bakomeje kurwara bakagira ibibazo byo kunanirwa guhumeka neza, n’ibitaro ngo bikaba byaragize umubare munini w’ababigana bavuga ko barwaye umusonga.

Umuyobozi mukuru w’Ishami ry’ Umuryango w’Abibumbye ryita ku buzima, Dr Tedros Adhanom Ghebreyesus, ubwe yasabye Tanzania ko yakwemera ko icyorezo cya Covid-19 gihari, ikabikora ku neza y’Abaturage bayo, ku neza y’ibihugu bituranye na yo, ndetse no ku neza y’Isi muri rusange, kuko ibihugu bitandukanye byakomeje kuvuga ko iyo byakiriye abantu baturutse muri Tanzania, bagapimwa basanga baranduye Covid-19.

Ku wa Gatandatu tariki 20 Gashyantare 2021, Tedros yavuze ko uko icyorezo cya Covid-19 kimeze muri Tanzania ari ibintu bihangayikishije cyane, asaba Perezida Magufuli kugira icyo akora. Si Tedros wenyine kandi wasabye Magufuli kugira icyo akora mu rwego rwo kurwanya Covid-19, ahubwo na Leta zunze ubumwe za Amerika ndetse na Kiliziya Gatolika y’aho muri Tanzania, byasabye ubuyobozi bwa Tanzania guhindura imyumvire kuri iki cyorezo.

MENYA UMWANDITSI

Mediatrice Uwingabire

Umunyamakuru

@ umureremedia

Reba inkuru zose nanditse ( 1906 )