Impanuka y’ubu bwato yabaye tariki 29 Ugushyingo 2024.

Umuvugizi w’Ikigo gishinzwe ubutabazi muri Nigeria, Ibrahim Audu yatangarije ibiro ntaramakuru by’Abongereza (Reuters), ko ubwo bwato bwari butwaye abagenzi bava ahitwa Kogi kuri urwo ruzi berekeza mu gihugu cy’abaturanyi cya Niger.

Ati “Abantu umunani nibo bemejwe ko bapfiriye muri iyo mpanuka mu gihe hari abandi batabawe naho abandi bakaburirwa irengero”.

Abayobozi ntibigeze batangaza icyateye iyi mpanuka y’ubu bwato cyakora, ibitangazamakuru byo muri Nigeria, byavuze ko ubwo bwato bwari butwaye abagenzi barenga 200, kurohama bikaba bishobora kuba byaratewe n’uburemere bwinshi ubwato butari bufitiye ubushobozi.

Inzego zishinzwe ibikorwa by’ubutabazi muri Nigeria, ziracyakomeje gushakisha abarohamye mu ruzi rwa Niger ariko icyizere ko baba bakiri bazima cyamaze kuyoyoka.

Kubera impanuka zikunze kuba muri Nigeria zigahitana ubuzima bw’abantu, abayobozi barasabwa gushyiraho ingamba zo gutwara abantu n’ibintu mu mazi.

Impanuka nyinshi zatewe n’uburemera bw’abajya mu bwato kuko usanga ababutwara batita ku ngano y’ibyagenewe kugenda muri ubwo bwato bakibagirwa no kwita ku mutekano y’ababugendamo.

Ikindi gikomeye nuko abagenzi bakunze kugenda muri ubwo bwato nta myambaro yabugenewe ituma batarohama (life jacket), ugasanga igihe bahuye n’impanuka ntawe ubashije kugira ikintu cyatuma atarohama. Ibi ariko bituruka ku kuba ba nyiri ubwato nta bushobozi bwo kugurira abagenzi iyo myambaro.